നൂറ്റിയെട്ടു ശിവക്ഷേത്രങ്ങൾ - 05/108 ചൊവ്വര ചിദംബേശ്വര ക്ഷേത്രം

നൂറ്റിയെട്ടു ശിവക്ഷേത്രങ്ങൾ - 05/108

ചൊവ്വര ചിദംബേശ്വര ക്ഷേത്രം

കേരളത്തിലെ എറണാകുളം ജില്ലയിൽ അങ്കമാലിക്കും, ആലുവയ്ക്കും ഇടയ്ക്ക് ചൊവ്വര ഗ്രാമത്തിലാണ് ചൊവ്വര ചിദംബരേശ്വരസ്വാമി ക്ഷേത്രം സ്ഥിതിചെയ്യുന്നത്. തമിഴ്നാട്ടിലെ ചിദംബരത്തെ നടരാജമൂർത്തി തന്നെയാണ് ഇവിടെയും കുടികൊള്ളുന്നത് എന്നു വിശ്വസിക്കുന്നു. ചിദംബരേശ്വരക്ഷേത്രം എന്നപേരുതന്നെ ഇതിന് ഉപോദ്ബലകമാണ്. ഇവിടുത്തെ ശിവലിംഗം ചിദംബരത്തു നിന്നും കൊണ്ടുവന്നതാണന്നും പിന്നീട് പരശുരാമൻ സ്ഥാപിച്ചതാണെന്നും വിശ്വസിക്കപ്പെടുന്നു. കേരളത്തിലെ 108 ശിവക്ഷേത്രങ്ങളിൽ ഒന്നാണിത്.

പടിഞ്ഞാറേക്ക് ദർശനമായിട്ടാണ് ക്ഷേത്രം നിർമ്മിച്ചിരിക്കുന്നത്. ചെറിയ ക്ഷേത്രമാണ്, മഹാക്ഷേത്രങ്ങളുടെ ചമയങ്ങൾ ഒന്നും തന്നെ കാണുന്നില്ല. കൊച്ചി രാജകുടുംബത്തിനു വളരെയേറെ ബന്ധമുള്ള കോവിലകം വക ക്ഷേത്രമായിരുന്നു ഇത്. കൊച്ചി രാജവംശത്തിലെ പ്രഗൽഭനായ ശക്തൻ തമ്പുരാൻ ജനിച്ച പുതിയേടം കൊട്ടാരം ഇവിടെ അടുത്താണ്.ചൊവ്വരയിൽ വെച്ചു തീപ്പെട്ട മൂലം തിരുനാൾ രാമവർമ്മ മഹാരാജാവിൻറെ ഓർമ്മക്കായി മുമ്പ് കൈപ്രക്കുന്ന് എന്നറിയപ്പെട്ടിരുന്ന ഈ പ്രദേശത്തിന് ശ്രീമൂലനഗരം എന്ന പേരു നല്കപ്പെട്ടു.

കേരളപഴമയുമായി ബന്ധപ്പെട്ട പറയിപെറ്റ പന്തിരുകുലത്തിലെ ചാത്തൻറെ വിഹാരരംഗമായ അകവൂർമനയും കൊട്ടാരത്തിൽ ശങ്കുണ്ണിയുടെ ഐതിഹ്യമാലയിൽ വിവരിക്കുന്ന തിരുവൈരാണിക്കുളം ക്ഷേത്രവും ഉൾക്കൊള്ളുന്ന ഈ ഗ്രാമം പെരിയാറിൻറെ തീരത്തു സ്ഥിതി ചെയ്യുന്നു.

എല്ലാ മകര മാസത്തിലും ഉത്സവം നടക്കുന്നു. ശിവരാത്രി പ്രധാനമാണ്. ഉപദേവതയായി ഗണപതി മാത്രമേ ഉള്ളു. കൊച്ചി ദേവസ്വം ആണ് ഭരണം നടത്തുന്നത്.