വിചിത്രമായ ഹോളി ആഘോഷം

വിചിത്രമായ ഹോളി ആഘോഷം

നിറങ്ങളുടെയും നിറക്കൂട്ടുകളുടെയും ആഘോഷമായാണ് ഹോളി അറിയപ്പെടുന്നത്. വസന്തകാലത്തെ എതിരേൽക്കുവാൻ നടത്തിയിരുന്ന ഒരാഘോഷം എന്നതിൽ നിന്നും ഭാരതം ഒന്നടങ്കം ആഘോഷിക്കുന്ന ഒന്നായി ഇത് മാറിയിട്ട് കുറച്ചു കാലമായതേയുള്ളു.

മിക്ക സ്ഥലങ്ങളിലും യഥാർഥ ആഘോഷ ദിവസത്തിനും 7 ദിവസം മുന്നേ തന്നെ ആഘോഷങ്ങൾ തുടങ്ങാറുണ്ട്.

ഉത്തർ പ്രദേശ്

ഉത്തർ പ്രദേശിൽ മഥുരയിലെ ബർസാനയിലും നന്ദഗാവോനിലും നടക്കുന്ന ആഘോഷങ്ങളാണ് ലത്മാർ ഹോളി എന്നറിയപ്പെടുന്നത്. ഐതിഹ്യങ്ങളനുസരിച്ച് കൃഷ്ണൻ തൻറെ ഭാര്യയായ രാധയുടെ ഗ്രാമത്തിലേക്ക് വരുന്ന ദിവസമാണത്രെ ഇത്. വരുന്ന വഴി കൃഷ്ണനും കൂട്ടുകാരും ചേർന്ന് രാധയെയും സുഹൃത്തുക്കളെയും കളിയാക്കുവാനും മറ്റും തുടങ്ങി. അപ്പോൾ കൂട്ടുകാരായ യുവതികൾ അവിടെ കിടന്നിരുന്ന ചുള്ളിക്കമ്പുകളും മറ്റുമെടുത്ത് കൃഷ്നനെയും മറ്റും പേടിപ്പിച്ചുവത്രെ. അതിന്റെ ഓർ‍മ്മയ്ക്കായാണ് ഇവിടെ ലത്മാർ ഹോളി എന്ന പേരിൽ ഹോളി ആഘോഷിക്കുന്നത്.

ഇവിടെ ലത്മാർ ഹോളി 7 ദിവസങ്ങളിലായാണ് നടത്തുന്നത്. കൃഷ്ണനെയും കൂട്ടുകാരെയും ചുള്ളിക്കമ്പെടുത്ത് അടിച്ചതിന്റെ ഓർമ്മ പുതുക്കലാണ് ഇവിടെ നടക്കുന്ന ആഘോഷം. ലാത്തി എന്നു പേരുള്ള വടികളുപയോഗിച്ചാണ് സ്ത്രീകൾ ഇവിടെ തല്ലുന്നത്. പുരുഷന്മാർ തല്ല് കിട്ടാതിരിക്കുവാൻ പരമാവധി ശ്രമിക്കും. വടി ദേഹത്തു കൊണ്ടാൽ ആ ആൾ പോയി വേഷപ്രഛന്നനായി വരണമത്രെ.

ലത്മാർ ഹോളിയുടെ പ്രധാന ആഘോഷങ്ങൾ നടക്കുന്ന ഇടമാണ് വൃന്ദാവൻ. ഇവിടുത്തെ ക്ഷേത്രത്തിലെ പ്രാർഥനകളോടു കൂടിയാണ് ഹോളി ആഘോഷം തുടങ്ങുക. ആദ്യം പുരോഹിതൻ ക്ഷേത്രത്തിൽ പ്രധാന പൂജകൾ നടത്തും. അതിനു ശേഷം ഇവിടെ പൂന്തോട്ടത്തില്‍ നിന്നും ശേഖരിച്ച വിവിധ വർണ്ണങ്ങളിലുള്ള പൂക്കൾ വിശ്വസികൾക്ക് നല്കും. അതിനു ശേഷമാണ് ഇവിടെ നിറത്തിലെ കളി ആരംഭിക്കുന്നത്. നിറക്കൂട്ടുകളും നിറം കലക്കിയ വെള്ളവും ഒക്കെ എടുത്തൊഴിച്ച് ആഘോഷങ്ങള്‌‍ തുടങ്ങുകയായി.

വളരെ വ്യത്യസ്തമായ രീതിയിൽ ഹോളി ആഘോഷിക്കുന്നവരാണ് ഗോകുലിലുള്ളത്. സാധാരണ എല്ലാ ആഘോഷങ്ങളിലും നിന്ന് മാറി നിൽക്കുന്ന വിധവകളായ സ്ത്രീകളാണ് ഇവിടുത്തെ ആഘോഷത്തിൻറെ ആളുകൾ. ഭാഗൽ ബാബ എന്നു പേരായ ഒരു ക്ഷേത്രമാണ് ആഘോഷങ്ങളുടെ കേന്ദ്രം.

ഇന്ത്യയിലെ മിക്ക ഭാഗങ്ങളിലും ഹോളി ആഘോഷങ്ങൾ നടക്കാറുണ്ട്.

മണിപ്പൂർ

ഹോളി ആഘോഷങ്ങൾ നടക്കാറുണ്ടെങ്കിലും വളരെ വ്യത്യസ്മായി കൊണ്ടാടുന്നവരാണ് മണിപ്പൂരുകാർ. ഇവിടുത്തെ യവോഷാങ് ഫെസ്റ്റിവലിന്റെ ഭാഗമായി നടക്കുന്ന ഹോളി ആഘോഷങ്ങൾ മണിപ്പൂരിന്റെ പ്രധാന ആഘോഷങ്ങളിലൊന്നാണ്. ആറു ദിവസം നീണ്ടു നിൽക്കുന്ന ആഘോഷങ്ങൾ വർഷത്തിൽ ഇവിടുത്തുകാർ ഏറ്റവും കൂടുതൽ സന്തോഷിക്കുന്ന അവസരം കൂടിയാണ്.

കൂടാതെ , മണപ്പൂരിന്റെ ഭംഗിയും കാഴ്ചകളും ഇവിടുത്തെ ആഘോഷത്തിന്റെ മാറ്റ് കൂട്ടുന്നു.

ആസാം

ഡോൾ ജത്ര എന്ന പേരിൽ രണ്ടു ദിവസം നീണ്ടു നിൽക്കുന്ന പ്രാദേശിക ഉത്സവമായാണ് അസമിലെ ഹോളി ആഘോഷം. ആദ്യ ദിവസം കളിമണ്ണിൽ നിർമ്മിച്ച കുടിലുകൾക്ക് തീ വയ്ക്കുന്ന ചടങ്ങാണ്. രണ്ടാം ദിവസമാകുമ്പോഴേയ്ക്കും നിറങ്ങളിലുള്ള ആഘോഷത്തിന് തുടക്കമാകും.

കർണ്ണാടക

തെക്കേ ഇന്ത്യയിലേക്ക് ഹോളി ആഘോഷങ്ങൾ തീർത്തു കുറവാണ്. എങ്കിലും അതിൽ ഒരു വ്യത്യസ്തത കാണിക്കുന്ന ഇടമാണ് കർണ്ണാടക. ഹോളിയുമായി ബന്ധപ്പെട്ട വലിയ ആഘോഷങ്ങളാണ് ഇവിടുത്തെ പ്രത്യേകത. പ്രത്യേകിച്ച് ബാംഗ്ലൂർ പോലെയുള്ള ഒരു നാട്ടിൽ എല്ലാ ദേശത്തു നിന്നുമുള്ള ആളുകൾ വസിക്കുമ്പോൾ ഹോളി ആഘോഷങ്ങൾക്ക് ഒരു കുറവുമുണ്ടാവില്ല.

കേരള

ഹോളി ആഘോഷങ്ങൾക്ക് പ്രത്യേകിച്ച് ഒരു പ്രാധാന്യവും നല്കാത്ത ഒരിടമാണ് കേരളം. എങ്കിൽ തന്നെയും ഇവിടുത്തെ അപൂർവ്വം ചിലയിടങ്ങളിൽ ഹോളി ആഘോഷങ്ങള്‍ കാണാം. പ്രധാനമായും മറ്റു സംസ്ഥാനങ്ങളിൽ നിന്നുള്ള ആളുകളുള്ള ഓഫീസുകൾ, കൊച്ചി, കോഴിക്കോട്, തിരുവനന്തപുരം പോലെയുള്ള ഇടങ്ങള്‌ തുടങ്ങിയ സ്ഥലങ്ങളിലാണ് ഹോളി ആഘോഷങ്ങൾ കാണുവാൻ സാധിക്കുക.