ഇന്ത്യനൂർ ഗണപതി ക്ഷേത്രം

ഇന്ത്യനൂർ ഗണപതി ക്ഷേത്രം

കേരളത്തിലെ ഗണപതി ക്ഷേത്രങ്ങളിലൊന്നാണ് മലപ്പുറം ജില്ലയിലെ തിരൂർ താലൂക്കിൽ കോട്ടക്കൽ നഗരസഭയിൽ ഇന്ത്യനൂർ ഗ്രാമത്തിൽ സ്ഥിതിചെയ്യുന്ന ഇന്ത്യനൂർ ശ്രീമഹാഗണപതി ക്ഷേത്രം. യഥാർത്ഥത്തിൽ, ഇതൊരു ശിവക്ഷേത്രമാണ്. പാർവ്വതീസമേതനായ പരമശിവനും മഹാവിഷ്ണുവും തുല്യപ്രാധാന്യത്തോടെ ശ്രീകോവിലുകളിൽ വാഴുന്നു. എന്നാൽ, കൊട്ടാരക്കര, മധൂർ, ഓങ്ങല്ലൂർ എന്നീ ക്ഷേത്രങ്ങളിലേതുപോലെ ഉപദേവനായ ഗണപതിയ്ക്കാണ് ക്ഷേത്രത്തിൽ കൂടുതൽ പ്രാധാന്യം ലഭിച്ചിരിയ്ക്കുന്നത്. കൂടാതെ സുബ്രഹ്മണ്യൻ, അയ്യപ്പൻ, വേട്ടയ്ക്കൊരുമകൻ, നാഗദൈവങ്ങൾ എന്നിവരും ക്ഷേത്രത്തിൽ ഉപദേവതകളായി കുടികൊള്ളുന്നുണ്ട്. പറയിപെറ്റ പന്തിരുകുലത്തിലെ നാറാണത്ത് ഭ്രാന്തനാണ് ഇവിടെ പ്രതിഷ്ഠ നിർവഹിച്ചതെന്ന് വിശ്വസിയ്ക്കപ്പെടുന്നു. വിനായക ചതുർത്ഥിയാണ് ക്ഷേത്രത്തിലെ പ്രധാന ആണ്ടുവിശേഷം. ഒപ്പം ശിവരാത്രി, തിരുവാതിര, അഷ്ടമിരോഹിണി, വിഷു, തിരുവോണം, നവരാത്രി, തൈപ്പൂയം, സ്കന്ദഷഷ്ഠി, മണ്ഡലകാലം എന്നിവയും വിശേഷങ്ങളാണ്. എന്നാൽ, ഈ അവസരങ്ങളിലൊന്നും വാദ്യമേളങ്ങളോ ശബ്ദകോലാഹലങ്ങളോ ഉണ്ടാകാറില്ല എന്നത് ശ്രദ്ധേയമാണ്. അവയൊന്നും ഈ ക്ഷേത്രത്തിലെ മൂർത്തികൾ ഇഷ്ടപ്പെടുന്നില്ല എന്നാണ് വിശ്വാസം. സാമൂതിരി കുടുംബത്തിന്റെ ശാഖയായ കോട്ടക്കൽ കിഴക്കേ കോവിലകമാണ് ക്ഷേത്രഭരണം നടത്തുന്നത്.

ക്ഷേത്രത്തിലെ ഗണപതിക്കുള്ള 'ഒറ്റ' വഴിപാട് പ്രസിദ്ധമാണ്. ഒരു നാഴി പച്ചരി അരച്ചെടുത്ത മാവിൽ ശർക്കര ഉരുക്കിച്ചേർത്ത് നെയ്യിൽ ചുട്ടെടുക്കുന്ന കട്ടിയുള്ള ഒരു മധുര പലഹാരമാണ് 'ഒറ്റ'.

പ്രാചീന കേരള ചരിത്രത്തിൽ ഇന്ത്യനൂർ മഹാഗണപതി ക്ഷേത്രത്തിന്റെ സ്ഥാനം

കോഴിക്കോട് സർവ്വകലാശാലയിലെ ചരിത്ര വിഭാഗം തലവനായിരുന്ന ഡോ. എം.ജി.എസ്. നാരായണൻ, ഡോ.ടി.കെ. രവീന്ദ്രൻ,  ഡോ.എം.ആർ. രാഘവവാര്യർ, ഡോ. കെ.കെ.എൻ.കുറുപ്പ്, തദ്ദേശവാസി കൂടിയായ ഇന്ത്യനൂർ ഗോപി എന്നിവർ അടങ്ങുന്ന ചരിത്ര ഗവേഷക സംഘം 1968 -ൽ ഇന്ത്യനൂർ ക്ഷേത്രത്തിലെ മുറ്റത്തു നിന്നും ഒരു പ്രാചീന ശിലാ ഫലകം കുഴിച്ചെടുത്തു. വട്ടെഴുത്ത് ലിപിയിൽ ഇരുവശത്തും എഴുത്ത് ഉള്ള ഫലകം കോഴിക്കോട് സർവ്വകലാശാലയിൽ സൂക്ഷിച്ചിട്ടുണ്ട്. കൊടുങ്ങല്ലൂർ (മഹോദയപുരം) ആസ്ഥാനമാക്കി ക്രിസ്തു വര്ഷം  944 മുതൽ 962 വരെ പ്രാചീന കേരളം ഭരിച്ചിരുന്ന ചേര രാജാവായ ഇന്ദു കോത രവിവർമ്മന്റെ ഭരണകാലത്ത് ഇന്ത്യനൂർ മഹാഗണപതി ക്ഷേത്രം പുതുക്കി പണിതു എന്നും ക്ഷേത്രത്തിന്റെ നിത്യ നിദാന ചെലവുകൾക്കായി കൃഷി സ്ഥലങ്ങൾ നീക്കി വച്ചതിന്റെ രേഖകളാണ് ഫലകത്തിൽ മുദ്രണം ചെയ്തിരിക്കുന്നത്.

ക്ഷേത്രപരിസരവും മതിലകവും

ഇന്ത്യനൂർ ഗ്രാമത്തിന്റെ ഏതാണ്ട് ഒത്ത നടുക്കായാണ് ക്ഷേത്രം സ്ഥിതിചെയ്യുന്നത്. കിഴക്കോട്ടാണ് ക്ഷേത്രത്തിന്റെ ദർശനം. ക്ഷേത്രത്തിന്റെ വടക്കുഭാഗത്തുകൂടെ കോട്ടക്കൽ - അങ്ങാടിപ്പുറം പാത കടന്നുപോകുന്നു. ഇവിടെത്തന്നെയാണ് ക്ഷേത്രകവാടവും സ്ഥിതിചെയ്യുന്നത്. കിഴക്കുഭാഗത്തുതന്നെയാണ് ക്ഷേത്രക്കുളവും.

സാധാരണ ക്ഷേത്രങ്ങളിൽ ശ്രീകോവിലിൽ ഒരു പ്രതിഷ്ഠയാണ് പതിവ്.പക്ഷെ ഇന്ത്യനൂർ മഹാഗണപതി ക്ഷേത്രത്തിലെ പ്രധാന ശ്രീകോവിലിൽ ശിവൻ കുടുംബ സമേതം സാന്നിധ്യം ചെയ്യുന്നു.(പരമശിവൻ,പാർവ്വതി,ഗണപതി,സുബ്രഹ്മണ്യൻ )