ശ്രീ ദക്ഷിണാമൂര്തി സ്തോത്രമ

|| ശ്രീ ദക്ഷിണാമൂര്തി സ്തോത്രമ്‌ ||

ഗുരുര്ബ്രഹ്മാ ഗുരുര്വിഷ്ണു: ഗുരുര്ദേവോ മഹേശ്വര: |
ഗുരു:സാക്ഷാത്‌ പരം ബ്രഹ്മാ തസ്മൈ ശ്രീ ഗുരവേ നമ: ||

ഓം യോ ബ്രഹ്മാണം വിദധാതി പൂര്വമ്‌
യോ വൈ വേദാംശ്ച പ്രഹിണോതി തസ്മൈ |
തം ഹ ദേവമാത്മബുദ്ധി പ്രകാശം
മുമുക്ഷുര്വൈ ശരണമഹം പ്രപദ്യേ ||

ഓം ശാംതി: ശാംതി: ശാംതി:

|| ഹരി: ഓം ||

വിശ്വം ദര്പണ ദൃശ്യമാന നഗരീതുല്യം നിജാംതര്ഗതം
പശ്യന്നാത്മനി മായയാ ബഹിരിവോദ്ഭൂതം യഥാ നിദ്രയാ |
യ: സാക്ഷാത്കുരുതേ പ്രബോധ സമയേ സ്വാത്മാന മേവാദ്വയം
തസ്മൈ ശ്രീ ഗുരുമൂര്തയേ നമ ഇദം ശ്രീ ദക്ഷിണാമൂര്തയേ || ൧ ||

ബീജസ്യാംതരിവാംകുരോ ജഗദിദം പ്രാങ്ന നിര്വികല്പം
പുനര്മായാ കല്പിത ദേശ കാലകലനാ വൈചിത്ര്യ ചിത്രീകൃതമ്‌ |
മായാവീവ വിജൃംഭയാത്യപി മഹായോഗീവ യ: സ്വേച്ഛയാ
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൨ ||

യസ്യൈവ സ്ഫുരണം സദാത്മകമസത്കല്പാര്ഥകം ഭാസതേ
സാക്ഷാത്തത്ത്വ മസീതി വേദവചസാ യോ ബോധയത്യാശ്രിതാന് |
യത്സാക്ഷാത്കരണാദ്ഭവേന്ന പുനരാവൃത്തിര്ഭവാംഭോനിധൗ
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൩ ||

നാനാച്ഛിദ്ര ഘടോദര സ്ഥിത മഹാദീപ പ്രഭാഭാസ്വരം
ജ്ഞാനം യസ്യ തു ചക്ഷുരാദികരണ ദ്വാരാ ബഹി: സ്പംദതേ |
ജാനാമീതി തമേവ ഭാംതമനുഭാത്യേതത്സമസ്തം ജഗത്‌
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൪ ||

ദേഹം പ്രാണമപീംദ്രിയാണ്യപി ചലാം ബുദ്ധിം ച ശൂന്യം വിധു:
സ്ത്രീബാലാംധ ജഡോപമാസ്ത്വഹമിതി ഭ്രാംതാഭൃശം വാദിന: |
മായാശക്തി വിലാസകല്പിത മഹാ വ്യാമോഹ സംഹാരിണേ
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൫ ||

രാഹുഗ്രസ്ത ദിവാകരേംദു സദൃശോ മായാ സമാച്ഛാദനാത്‌
സന്മാത്ര: കരണോപ സംഹരണതോ യോഽ ഭൂത്സുഷുപ്ത: പുമാന്‌ |
പ്രാഗസ്വാപ്യ മിതി പ്രബോധ സമയേ യ: പ്രത്യഭിജ്ഞായതേ
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൬ ||

ബാല്യാദിഷ്വപി ജാഗ്രദാദിഷു തഥാ സര്വാസ്വവസ്ഥാസ്വപി
വ്യാവൃത്താ സ്വനുവര്തമാന മഹമിത്യംത: സ്ഫുരംതം സദാ |
സ്വാത്മാനം പ്രകടീകരോതി ഭജതാം യോ മുദ്രയാ ഭദ്രയാ
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൭ ||

വിശ്വം പശ്യതി കാര്യകാരണതയാ സ്വസ്വാമിസംബംധത:
ശിഷ്യാചാര്യതയാ തഥൈവ പിതൃപുത്രാദ്യാത്മനാ ഭേദത: |
സ്വപ്നേ ജാഗ്രതി വാ യ ഏഷ പുരുഷോ മായാപരിഭ്രാമിത:
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൮ ||

ഭൂരംഭാംസ്യനലോഽനിലോംഽബര മഹര്നാഥോ ഹിമാംശു: പുമാന്
ഇത്യാഭാതി ചരാചരാത്മകമിദം യസ്യൈവ മൂര്ത്യഷ്ടകമ്‌ |
നാന്യത്കിംചന വിദ്യതേ വിമൃശതാം യസ്മാത്പരസ്മാദ്വിഭോ:
തസ്മൈ ശ്രീ ഗുരുമൂര്തയേ നമ: ഇദം ശ്രീ ദക്ഷിണാമൂര്തയേ || ൯ ||

സര്വാത്മത്വമിതി സ്ഫുടീകൃതമിദം യസ്മാദമുഷ്മിന്‌ സ്തവേ
തേനാസ്യ ശ്രവണാത്തദര്ഥ മനനാദ്ധ്യാനാച്ച സംകീര്തനാത്‌ |
സര്വാത്മത്വമഹാവിഭൂതി സഹിതം സ്യാദീശ്വരത്വം സ്വത:
സിദ്ധ്യേത്തത്പുനരഷ്ടധാ പരിണതം ച ഐശ്വര്യമവ്യാഹതമ്‌ || ൧൦ ||

വടവിടിപി സമീപേ ഭൂമി ഭാഗേ നിഷണ്ണം
സകല മുനിജനാനാം ജ്ഞാനദാതാര മാരാത്‌ |
ത്രിഭുവനഗുരുമീശം ദക്ഷിണാമൂര്തിദേവം
ജനനമരണ ദു:ഖച്ഛേദ ദക്ഷം നമാമി ||

ഓം നമ: പ്രണവാര്ഥായ ശുദ്ധജ്ഞാനൈകമൂര്തയേ
നിര്മലായ പ്രശാംതായ ദക്ഷിണാമൂര്തയേ നമ: ||
നിധയേ സര്വ വിദ്യാനാം ഭിഷജേ ഭവരോഗിണാം |
ഗുരവേ സര്വലോകാനാം ശ്രീ ദക്ഷിണാമൂര്തയേ നമ: ||

|| ഇതി ശ്രീ ശംകരാചാര്യ വിരചിത ദക്ഷിണാമൂര്തി സ്തോത്രമ്‌ സംപൂര്ണമ്‌ ||