॥ പരമേശ്വരസ്തോത്രം ॥
ജഗദീശ സുധീശ ഭവേശ വിഭോ
പരമേശ പരാത്പര പൂത പിതഃ ।
പ്രണതം പതിതം ഹതബുദ്ധിബലം
ജനതാരണ താരയ താപിതകം ॥ 1॥
ഗുണഹീനസുദീനമലീനമതിം
ത്വയി പാതരി ദാതരി ചാപരതിം ।
തമസാ രജസാവൃതവൃത്തിമിമം
ജനതാരണ താരയ താപിതകം ॥ 2॥
മമ ജീവനമീനമിമം പതിതം
മരുഘോരഭുവീഹ സുവീഹമഹോ ।
കരുണാബ്ധിചലോമിര്‍ജലാനയനം
ജനതാരണ താരയ താപിതകം ॥ 3॥
ഭവവാരണ കാരണ കര്‍മതതൌ
ഭവസിന്ധുജലേ ശിവ മഗ്നമതഃ ।
കരുണാഞ്ച സമര്‍പ്യ തരിം ത്വരിതം
ജനതാരണ താരയ താപിതകം ॥ 4॥
അതിനാശ്യ ജനുര്‍മമ പുണ്യരുചേ
ദുരിതൌഘഭരൈഃ പരിപൂര്‍ണഭുവഃ ।
സുജഘണ്യമഗണ്യമപുണ്യരുചിം
ജനതാരണ താരയ താപിതകം ॥ 5॥
ഭവകാരക നാരകഹാരക ഹേ
ഭവതാരക പാതകദാരക ഹേ ।
ഹര ശങ്കര കിങ്കരകര്‍മചയം
ജനതാരണ താരയ താപിതകം । 6
തൃഷിതഞ്ചരമസ്മി സുധാം ഹിത മേ
ഽച്യുത ചിന്‍മയ ദേഹി വദാന്യവര ।
അതിമോഹവശേന വിനഷ്ടകൃതം
ജനതാരണ താരയ താപിതകം ॥ 7॥
പ്രണമാമി നമാമി നമാമി ഭവം
ഭവജന്‍മകൃതിപ്രണിഷൂദനകം ।
ഗുണഹീനമനന്തമിതം ശരണം
ജനതാരണ താരയ താപിതകം ॥ 8॥
ഇതി പരമേശ്വരസ്തോത്രം സമ്പൂര്‍ണം ।
No comments:
Post a Comment