കേദരേശ്വര്‍ ഒറ്റത്തൂണിലെ അത്ഭുതം
നിരവധി ശിവ ഭക്തര്‍ എത്തുന്ന സ്ഥലമാണ് മഹാരാഷ്ട്രയിലെ അഹമദ്‌നഗര്‍ ജില്ലയില്‍ സ്ഥിതി ചെയ്യുന്ന ഹരിശ്ചന്ദ്രഗഡ്. ഇവിടത്തെ അത്ഭുത ക്ഷേത്രമാണ് ഏവരെയും ആകര്‍ഷിക്കുന്നത്. കേദാരേശ്വര്‍ ഗുഹാ ക്ഷേത്രമെന്ന് പറഞ്ഞാല്‍ കൂടുതല്‍ വ്യക്തമാകും. ഹരിശ്ചന്ദ്രേശ്വര്‍ ക്ഷേത്രത്തിന് സമീപമാണ് ഈ ഗുഹാക്ഷേത്രമുള്ളത്.
കേദരേശ്വര്‍ ഗുഹാ ക്ഷേത്രത്തിലെ ശിവലിംഗത്തിന് ചുറ്റിലും വെള്ളവും കാണാം. ശിവലിംഗം തറയില്‍ നിന്ന് അഞ്ചടി ഉയരത്തിലാണ് സ്ഥിതി ചെയ്യുന്നത്. ശിവലിംഗത്തിന് മുകളിലായി വലിയൊരു കല്‍മണ്ഡപം കാണാനാകും. മണ്ഡപത്തിന് നാലു തൂണുകളുണ്ടായിരുന്നെങ്കിലും ഇപ്പോള്‍ ഒരു തൂണ് മാത്രമാണ് കാണാനുള്ളത്. ഇതാണ് കേദരേശ്വര്‍ ക്ഷേത്രത്തിലെ ഏറ്റവും വലിയ അത്ഭുതം.
ഒറ്റത്തൂണില്‍ ശിവലിംഗത്തിന് മുകളില്‍ നില്‍ക്കുന്ന മണ്ഡപം ശരിക്കും ഒരു കൗതുകമായിരിക്കും. ഓരോ തൂണുകളും ഓരോ യുഗങ്ങളെയാണ് സൂചിപ്പിക്കുന്നത് എന്നാണ് പറയപ്പെടുന്നത്.
സത്യയുഗം, ത്രേതായുഗം, ദ്വാപരയുഗം, കലിയുഗം എന്നിവയാണ് യുഗങ്ങള്‍. ഇതില്‍ ആദ്യത്തെ മൂന്ന് യൂഗങ്ങള്‍ കഴിഞ്ഞതിനെയാണ് മൂന്നു തൂണുകളുടെ അഭാവം സൂചിപ്പിക്കുന്നത്. ഓരോ യുഗം കഴിയുമ്ബോഴും ഓരോ തൂണുകള്‍ തകരും. എന്നാണോ നാലാമത്തേയും അവസാനത്തേയും തൂണ് തകരുക, എന്ന് ലോകം അവസാനിക്കും എന്നാണ് കണക്കാക്കപ്പെടുന്നത്. തൂണുകളിലും കൊത്തുപണികള്‍ കാണാനാകും. പുരാണകഥകളിലെ പ്രധാന ഭാഗങ്ങളാണ് ഇതില്‍ കൊത്തിവെച്ചിരിക്കുന്നത്.
മഹാരാഷ്ട്രയിലെ അഹമദ്നഗറിലെ ഹരിശ്ചന്ദ്ര കോട്ട ട്രെക്കിങ്ങുകാര്‍ക്കിടയില്‍ പ്രശസ്തമാണ്. സമുദ്രനിരപ്പില്‍ നിന്ന് 4670 അടി ഉയരത്തിലാണ് ഇത് സ്ഥിതി ചെയ്യുന്നത്. ഈ കോട്ടയില്‍ നിവധി ക്ഷേത്രങ്ങള്‍ കാണാം. ആറാം നൂറ്റാണ്ടിന്റെ ചരിത്രമാണ് ഈ കോട്ടയ്ക്ക് പറയാനുള്ളത്. കോട്ടയിലെ ഏറ്റവും വലിയ പര്‍വതത്തിന്റെ താഴെ നിരവധി ഗുഹകള്‍ കാണാം. ഇതില്‍ രണ്ടെണ്ണം താമസയോഗ്യമാണ്. എഴുപതു മുതല്‍ എണ്‍പതു പേര്‍ക്കു വരെ ഇവിടെ താമസിക്കാനുള്ള സൗകര്യമുണ്ട്. തടാകമുണ്ടെങ്കിലും കുടിക്കാന്‍ ഈ വെള്ളം അനുയോജ്യമല്ല. അതിനാല്‍ ട്രെക്കിങ്ങിന് വരുന്നവര്‍ കുടിവെള്ളം കൂടെ കരുതുന്നതാണ് നല്ലത്. കോട്ടയുടെ മുകളിലെത്തിയാല്‍ ഗ്രാമീണര്‍ തയ്യാറാക്കുന്ന ഭക്ഷണ വിഭവങ്ങള്‍ ലഭിക്കും. കിരേശ്വര്‍ ഗ്രാമത്തിലും ഭക്ഷണം ലഭിക്കും. ദൈര്‍ഘ്യമേറിയ ട്രെക്കിംഗ് ആയതിനാല്‍ ആവശ്യത്തിന് ലഘുഭക്ഷണം കയ്യില്‍ കരുതുന്നതും നല്ലതാണ്.
ഹരിശ്ചന്ദ്ര കോട്ടയിലേക്കുള്ള ട്രെക്കിങ്ങിന് ഒന്നിലധികം റൂട്ടുകളുണ്ട്. തോലാര്‍ കിന്ദ് വഴിയുള്ള റൂട്ടാണ് ഏറ്റവും മികച്ച കാഴ്ച്ചകള്‍ സമ്മാനിക്കുന്നതും ഏറ്റവും എളുപ്പമുള്ളതുമായ റൂട്ട്. താഴ്വാരത്തെ കിരേശ്വര്‍ എന്ന ഗ്രാമത്തില്‍ നിന്നാണ് ട്രെക്കിംഗ് ആരംഭിക്കുന്നത്.
No comments:
Post a Comment