പ്രതിദിനം മുടങ്ങാതെ ചെയ്യേണ്ട സാധനയാണ് അർച്ചന. ഇതോടൊപ്പം ചെയ്യേണ്ട ഒരു സാധനയാണ്, മാനസപൂജ. ആചാര്യന്മാർ മാനസപൂജയ്ക്ക് വലിയ മഹത്വമാണ് കല്പിച്ചിരിക്കുന്നത്.
വിഭിന്ന ദേവതകൾക്കുള്ള മാനസപൂജകൾ സ്ത്രോത്ര രൂപത്തിൽ ധാരാളമായി രചിയ്ക്കപ്പെട്ടിട്ടുണ്ട്. മാനസപൂജ വിധിയാംവണ്ണമുള്ള ഏതെങ്കിലും 'ആസനത്തിലിരുന്നു കൊണ്ടു ചെയ്യുക എന്നതാണ് സാധാരണ രീതി (എപ്പോൾ എവിടെ വച്ചു വേണമെങ്കിലും മാനസപൂജ ചെയ്യാമെന്നത് ശ്രദ്ധേയമാണ്)
അർച്ചനയ്ക്കായി ഒരുക്കിയ ആസനത്തിലിരുന്നു കണ്ണുകളടച്ച് ആദ്യം നമ്മുടെ ഉള്ളിൽ തന്നെ ഇഷ്ടമൂർത്തിയെ ദർശിക്കണം. സാധകൻ തന്റെ ഭാവനാ ശക്തിയെ വേണ്ട വിധം ഉപയോഗിയ്ക്കണം. കണ്ണടച്ച് തന്റെ മനക്കണ്ണുകൾ കൊണ്ട് ഹൃദയസ്ഥാനത്തോ അഥവാ മുൻപിലോ ഒരു സ്വർണ്ണ സിംഹാസനം. ഭാവന ചെയ്ത് ഇഷ്ടമൂർത്തി അതിൽ ഇരിയ്ക്കുന്നതായി ഭാവന ചെയ്യാം.
തുടർന്ന് ശുദ്ധജലം, പാൽ, തൈര്, നെയ്യ്, തേൻ, പനിനീർ തുടങ്ങിയവകൊണ്ട് ഉപാസനാമൂർത്തിയെ അഭിഷേകം ചെയ്യുന്നതായി മനസ്സുകൊണ്ടു കാണണം.
മനോഹരമായ പട്ടുവസ്ത്രങ്ങൾ, തങ്കക്കിരീടം, സ്വർണ്ണാഭരണങ്ങൾ, തുടങ്ങിയവ ദേവതയെ അണിയിയ്ക്കുന്നതായി ഭാവന ചെയ്യണം.
അവിടുത്തെ തിരുനെറ്റിയിൽ തിലകം, കഴുത്തിൽ പുഷ്പമാല തുടങ്ങിയവ ചാർത്തുന്നതായി ഭാവന ചെയ്യണം.
ദേവതയ്ക്കു പുഷ്പാർച്ചന, നൈവേദ്യം, ആരതി, പ്രദക്ഷിണം, നമസ്കാരം തുടങ്ങിയവയെല്ലാം മാനസികമായി തന്നെ ചെയ്യണം ഇങ്ങനെ തന്റെ ഭാവന കൊണ്ട് ആരാധനകളർപ്പിച്ചു ചെയ്യുന്ന മാനസപൂജ സാധകന്റെ ഏകാഗ്രതയ്ക്കും ചിത്തശുദ്ധിയ്ക്കും തദ്വാര ആദ്ധ്യാത്മിക വളർച്ചയ്ക്കും അത്യന്തം ഉപകരിയ്ക്കുന്നു
"പൂജാരിയെ കൊണ്ടും മന്ത്രവാദിയെ കൊണ്ടു മൊക്കെ അനേക വർഷം പൂജച്ചെയ്യിപ്പിച്ചാൽ പോലും കിട്ടാത്ത ശക്തിയാണ് ഏകാഗ്രമായ മാനസപൂജ കൊണ്ടു കിട്ടുന്നത്...
No comments:
Post a Comment