അഘോരിയും നാഗ സന്യാസിമാരും

അഘോരിയും നാഗ സന്യാസിമാരും

അഘോരി സന്യാസിമാരും നാഗ സന്യാസിമാരും ഒന്നാണെന്ന തെറ്റിദ്ധാരണ പലരും വച്ച് പുലർത്തുന്നുണ്ട്....

ഭാരതത്തിലെ നിരവധിയായ സന്യാസ ശാഖകളിൽ രണ്ട് വ്യത്യസ്ത വിഭാഗങ്ങളാണ് അഘോരികളും നാഗ സന്യാസിമാരും.

ഭസ്മം പൂശിയ ദേഹവുമായി, തീക്ഷ്ണമായ് ജ്വലിക്കുന്ന കണ്ണുകളും എന്നാൽ പ്രസന്ന ഭാവും കൊണ്ട് നാഗ സന്യാസിമാരെ പെട്ടന്ന് തിരിച്ചറിയാൻ കഴിയും, ആരാധന ഉൾപ്പെടെ സമ്പ്രദായങ്ങൾ വ്യത്യസ്‌തമാണെങ്കിലും നാഗ സന്യാസിമാരുടെയും അഘോരികളുടെയും തത്വം പവിത്രമായ ശിവതത്വം തന്നെയാണ്. 

കുംഭ മേളയിൽ ആദ്യമായി സ്നാനം ചെയ്യാനുള്ള അവകാശം നാഗ സന്യാസിമാർക്കാണ്. കുംഭ മേളക്ക് 13 അഘാടകൾ എന്ന് വിളിക്കുന്ന നാഗ സാധു ആശ്രമങ്ങളാണ് പങ്കെടുക്കാറുള്ളത്. അതിൽ ഏഴെണ്ണം മാത്രമാണ് ശൈവ ധാരയിൽ ഉള്ളത്. ബാക്കി ഉള്ളതിൽ 5 എണ്ണം വൈഷ്ണവ പദ്ധതിയും മൂന്നെണ്ണം സിഖ് ഖൽസ സമ്പ്രദായവും പിന്തുടരുന്നു. ധ്വജ് കെ രക്ഷക് ‘ എന്നതാണ് നാഗസാധുക്കളുടെ സ്ഥാനം. ധ്വജം ഓരോ അഘാടകൾക്കും വേറെ ആണ്. എന്നാൽ ആത്യന്തികമായി അവർ സംക്ഷിക്കേണ്ട ധ്വജം അഘാഡകളുടെ മാത്രമല്ല, ഭാരതത്തിന്റെ ധ്വജം അഥവാ ഭാരതത്തിന്റെ പൈതൃകം തന്നെയാണ്. ആദി ഗുരു ശങ്കരാചാര്യരാണ് നാല് പീഠങ്ങളോട് ചേർന്ന് അഘാഡകൾ സ്ഥാപിച്ച് നാഗ സന്യാസിമാരെ ചുമതലപ്പെടുത്തിയത്. ആയുധങ്ങൾ കൊണ്ട് യുദ്ധം ചെയ്യുന്ന "അസ്ത്രധാരികളും", ജ്ഞാനം കൊണ്ട് ഭാരത സംസ്‌കൃതിയെ സംരക്ഷിക്കുന്ന "ശാസ്ത്രധാരികളും" എന്ന രണ്ടു വിഭാഗം നാഗ സന്യാസിമാർക്കിടയിലുണ്ട്.

വാരണാസിയിലെ ശ്രി പഞ്ച ദശനാം ജൂഡ അഘാഡ, വാരണാസിയിൽ തന്നെയുള്ള മറ്റൊരു അഘഡയായ അടൽ, പ്രയാഗിലുള്ള മഹാനിർവാണി, നിരഞ്ജനി, ആവാഹൻ, നാസിക്കിലുള്ള തപോനിധി ആനന്ദ് എന്നിവയാണ് പ്രധാനപ്പെട്ട ശൈവ അഘാടകൾ. 

നിര്‍വാണി (അയോധ്യ), നിര്‍മോഹി (മധുര), ദിഗംബര്‍(സബര്‍കന്ത) എന്നിവർ വൈഷ്ണവധാരയില്‍ പെടുന്നു.

നിർമല (സിഖ്) സമ്പ്രദായം പിൻതുടരുന്ന നിർമല അഘാഡയും, ഉദാസീൻ (സിഖ് ) സമ്പ്രദായം പിന്തുടരുന്ന ഹരിദ്വാറിലുള്ള ഉദാസീൻ, ബഡാ ഉദാസീൻ (സിഖ് ) എന്നീ അഘാടകളും സിഖ് പദ്ധതി പ്രകാരം ആണ്.

നാഗ സന്യാസി ആവാനുള്ള താല്പര്യം ജനിച്ചാൽ ആ വ്യക്തി 13 അഘാടകളിൽ ഏതെങ്കിലും ഒന്നിനെ സമീപിക്കണം . വളരെ സൂക്ഷ്മമായ അന്വേഷണം ആണ് ആ വ്യക്തിയുടെ കഴിഞ്ഞ കാലത്തെ കുറിച്ച് ആഘാടകൾ നടത്തുക. അർഹത ഉള്ള ആളാണെന്നു കണ്ടാൽ അഘടകൾ അവർക്കു പ്രവേശന അനുമതി നൽകും. ശിഖ കളഞ്ഞു ജട വളർത്തിയും, ഭൂമിയിൽ കിടന്നുറങ്ങിയും, ദിവസം ഒരു നേരം മാത്രം ഭിക്ഷയായി ലഭിക്കുന്ന സാത്വിക ഭക്ഷണം കഴിച്ചുമാണ് അഘാടകളിൽ അവർ ജീവിക്കുക. ഇങ്ങനെ 6 മുതൽ പന്ത്രണ്ട് വർഷം വരെ അവർ അഘാടയിൽ തുടരും. തയ്യാറായെന്നു ഗുരു തീർച്ചയാക്കിയാൽ ബ്രഹ്മചാരി അവനവനു വേണ്ടി പിണ്ഡ(ബലി ) തർപ്പണം നടത്തും. ശേഷം കുംഭ മേളയിൽ സ്നാനം നടത്തിയാലാണ് മന്ത്ര ദീക്ഷ ലഭിക്കുക. ബ്രഹ്‌മചാരിയുടെ അടുത്ത ഘട്ടം മഹാപുരുഷൻ ആണ്. മഹാപുരുഷനായ നാഗ സാധുവിനു പഞ്ച പരമേശ്വരന്മാരാണ് ഗുരുക്കന്മാർ. മഹാവിഷ്ണു, പരമശിവൻ, സൂര്യ ഭഗവാൻ, ഗണപതി, പരാശക്തി എന്നിവരെ ഗുരുക്കന്മാരായി കണ്ട് സാധു ഉപാസിക്കുന്നു.

മഹാപുരുഷനായി പൂർണത ലഭിച്ചാൽ അവധൂതൻ എന്ന ഘട്ട നാഗസന്യാസി നീങ്ങും തല മുണ്ഡനം ചെയ്തു വീണ്ടും പിണ്ഡ തർപ്പണം നടത്തും. അവധൂതൻ വസ്ത്രങ്ങൾ അടക്കം എല്ലാം ത്യജിച്ചു ദിഗംബരൻ ആവണം. പിന്നീട് അഹംബോധവും, ബന്ധനങ്ങളും എല്ലാം ഉപേക്ഷിച്ച അവരെ ബന്ധിക്കുന്നത് ധർമ സംരക്ഷണം എന്ന കർമം മാത്രമാണ്. ശേഷം അവധൂതർ അഘാടകൾ ഉപേക്ഷിച്ചു ഹിമാലയ സാനുക്കളിൽ തപസ്സിൽ തുടരും. കുംഭ മേളക്ക് മാത്രമാണ് അവർ ജനമധ്യത്തിലേക്കു ഇറങ്ങുക . കൊടും ശൈത്യത്തിലും വിവസ്ത്രരായി അവർ ജീവിക്കുന്നു. അവരുടെ ആരോഗ്യം കാക്കുന്നത് ഹിമാലയ സാനുക്കളിലെ പച്ചമരുന്നും കഠിന ജപ സാധനകളുമാണ്.