ഭദ്രകാളിയെ അറിയാം ഉപാസിക്കാം
പ്രാചീനകാലം മുതൽ ഭാരതീയർ ആരാധിച്ചുവരുന്ന ദേവിയാണ് കാളി. ദാരിക വധത്തിനായി ശിവന്റെ തൃക്കണ്ണിൽ നിന്നും ജനിച്ചവളാണെന്നും, ദക്ഷന്റെ യാഗാഗ്നിയിൽ സതി ദേഹത്യാഗം ചെയ്തതിൽ ക്രുദ്ധനായിത്തീർന്ന പരമശിവൻ ദക്ഷനോടുള്ള പ്രതികാരത്തിനായി തന്റെ ജട നിലത്തടിച്ചപ്പോൾ ജന്മമെടുത്തതാണ് ഭദ്രകാളിയെന്നും രണ്ട് വിശ്വാസങ്ങൾ പ്രചാരത്തിലുണ്ട്.
മേൽപ്പറഞ്ഞ രണ്ടു ഭാവങ്ങൾ കൂടാതെ വേറെയും കാളി ഉപാസന സമ്പ്രദായങ്ങളുണ്ട്. മധുകൈടഭന്മാരെ വധിക്കാനായി അവതരിച്ച ഭദ്രകാളി എന്നൊരു വിശ്വാസമുണ്ട്. മധുകൈടഭന്മാരെന്ന രണ്ട് അസുരന്മാരുമായുള്ള യുദ്ധത്തിൽ ഭഗവാൻ വിഷ്ണു തളരുകയും ആ സമയത്ത് ഭദ്രകാളി അവതരിച്ചുവെന്നുമൊരു വിശ്വാസമുണ്ട്. ദേവീ മാഹാത്മ്യത്തിൽ ഈ കഥയാണ് ആദ്യം പറയുന്നത്.
പരദേവതയായും അല്ലാതെയും കേരളത്തിൽ ഏറ്റവും കൂടുതൽ ആരാധിക്കപ്പെടുന്നത് ഭദ്രകാളിയെയാണ്. ശ്രീ പാർവതിയുടെ രൂപമായ കാളിയെ ശിവപ്രിയയായി കരുതിയാണ് ആരാധിക്കുന്നത്. ബ്രഹ്മാവിൽ നിന്നും വരം നേടിയ ദാരികൻ ഭുമിയും ആകാശവും പാതാളവും വിറകൊള്ളിച്ച് ഭരിച്ചു. വിഷ്ണുവിനും ശിവനും ബ്രഹ്മാവിനും ഇന്ദ്രനും യമനുമൊന്നും ദാരികനെ കീഴടക്കാനായില്ല. അവസാനം ശ്രീ പരമേശ്വരൻ അണ്ഡകടാഹത്തെ കിടുക്കിക്കൊണ്ട് ഭീകരവും രൗദ്രവുമായ ഭാവമുള്ള ഭദ്രകാളിയെ സൃഷ്ടിച്ച് ദാരികന് നേരെ അയച്ചു. ശിവപുത്രിയായ കാളി അനായാസം ദാരികനെ നിഗ്രഹിച്ചു.
പത്തു രൂപങ്ങളിൽ ആരാധിക്കപ്പെടുന്ന കാളീ മാതാവ് എല്ലാ ദു:ഖദുരിതങ്ങളും അകറ്റി മംഗളങ്ങളും സുഖവും നൽകുന്ന സർവേശ്വരിയാണ്. മഹാമാരികളും ശത്രുദോഷവും ബാധാദേഷവും അകറ്റുന്ന വാത്സല്യനിധിയായ ഭദ്രകാളി ആശ്രയിക്കുന്ന ആരെയും ഉപേക്ഷിക്കില്ല.
ബംഗാൾ തുടങ്ങിയ സ്ഥലങ്ങളിൽ കാളിയെ ദശമഹാവിദ്യകളിൽ ഒന്നായ ദക്ഷിണ കാളിക എന്ന ഭാവത്തിലാണ് ആരാധിക്കുന്നത്. ഇനിയും മറ്റൊരു വിശ്വാസമുണ്ട്. അതിങ്ങനെയാണ്.
മൂന്നുകൽപ്പങ്ങളിലായി മൂന്ന് മഹിഷാസുരന്മാരുണ്ടായെന്നും അതിൽ ഒന്നാമത്തെ കൽപ്പത്തിൽ ഉഗ്രചണ്ഡ എന്ന കാളിയും രണ്ടാമത്തെ കൽപ്പത്തിൽ ഭദ്രകാളിയും മൂന്നാമത്തെ കൽപ്പത്തിൽ മഹിഷാസുര മർദ്ദിനിയായ ദുർഗ്ഗാ ഭഗവതിയായും അവതരിച്ചാണ് ഈ അസുരന്മാരെ വധിച്ചതെന്നും ഒരു വിശ്വാസമുണ്ട്.
ഇതിൽ രണ്ടാമത്തെ കൽപ്പത്തിൽ അവതരിച്ച ഭദ്രകാളിയെ വടക്കൻ കേരളത്തിൽ മാന്ത്രിക സാധനകൾക്കായി ആരാധിക്കാറുണ്ട്. ഇനി വേറൊരു ഭദ്രകാളി സങ്കൽപം കൂടിയുണ്ട്. അതിന്റെ ഐതിഹ്യം ഇങ്ങനെയാണ്.
രാവണ വധത്തിന് ശേഷം അയോധ്യയിൽ ശ്രീരാമൻ തിരികെ എത്തി ഭരണം നടത്തുന്ന കാലത്ത് സഹസ്രമുഖ രാവണൻ എന്ന അസുരന്റെ ഉപദ്രവങ്ങൾ ഉണ്ടായി. മഹർഷിമാർ ശ്രീരാമനോട് സങ്കടമുണർത്തിച്ച സമയത്ത് അദ്ദേഹം സഹസ്രമുഖ രാവണനോട് യുദ്ധത്തിനായി പുറപ്പെട്ടു. അപ്പോൾ പത്നിയായ സീത യുദ്ധത്തിൽ ശ്രീരാമനോടൊത്ത് യുദ്ധത്തിൽ അദ്ദേഹത്തെ സഹായിക്കാൻ കൂടെപ്പുറപ്പെട്ടു.
പുരുഷന്മാരാൽ വധിക്കപ്പെടില്ലെന്നും സ്ത്രീയാൽ മാത്രമേ വധിക്കപ്പെടൂ എന്ന വരബലമുള്ള അസുരനായിരുന്നു ത്രിലോകീപുരത്തെ സഹസ്രമുഖ രാവണൻ. രാവണനുമായി യുദ്ധം ചെയ്തെങ്കിലും അസുരനെ വധിക്കാൻ സാധിക്കാതെ ശ്രീരാമൻ ക്ഷീണിതനായി മോഹലാസ്യപ്പെട്ടുവീണു. ഇതോടെ സീതാദേവി ഭദ്രകാളീ രൂപം പൂണ്ട് സഹസ്രമുഖ രാവണനെ വധിച്ചു എന്നാണ് ഐതിഹ്യം. സീതാദേവിയുടെ ഈ ഭദ്രകാളി രൂപത്തെ പ്രശംസിച്ചുകൊണ്ട് ഹനുമാൻ രചിച്ച ഭദ്രകാളി സ്തുതിയും പ്രചാരത്തിലുണ്ട്.
കാളി വിധാനം
🎀❉━═══🪷═══━❉🎀
കാശ്മീർ ക്രമ കാളികുല സാമ്പ്രാദായത്തിൽ ആണ് ഈ വിധികൾ. ഭാരതത്തിൽ നിരവധി കാളികുല സമ്പ്രദായം ഉണ്ട് അവയിൽ കാളികുല ദീക്ഷാദികൾ വ്യത്യസ്തമാണ് ഇവിടെ കാശ്മീർ ക്രമ സമ്പ്രദായത്തിൽ ആണ് കാല സംഘർഷിണി ദേവിയേ പൂർണ്ണ കാളിയായി ആരാധിക്കുന്നത്. കാശ്മീർ കാളി ക്രമവുമായി ബന്ധപെട്ടു കിടക്കുന്ന സാധനയാണ് ഇത്. കാളിയുടെ വ്യത്യസ്ത ഭാവങ്ങളിലൂടെ വ്യത്യസ്ത ബോധമണ്ഡലത്തിലൂടെ സാധകനെ കൊണ്ട് പോകുന്ന സാധന പദ്ധതി ആണ് ക്രമ കാളി വിധാനം .
അഷ്ടകാളി (8 കാളി)
🎀❉━═══🪷═══━❉🎀
1] ചിന്താമണി കാളി
2] സ്പര്ശമണി കാളി
3] സിദ്ധ കാളി
4] സന്തത പ്രദ കാളി
5] വ്യോമ കാളി
6] ക്രോധ കാളി
7] ധന കാളി
8] വിദ്യാ കാളി
എന്നിവയാണ് ഇതിന്റെ പ്രമാണം. "കാളി സിദ്ധ മഞ്ജരി " എന്ന കാളികുല ഗ്രന്ഥത്തിൽ ആണ് പറഞ്ഞിട്ടുള്ളത്. ഈ ക്രമം സൃഷ്ടി ക്രമം ആയിട്ടാണ് ജപം ഈ കാളി ഭാവങ്ങൾക്കു ഭൈരവൻ മഹാ കാളൻ ആകുന്നു.
ദ്വാദശ കാളി (12 കാളി)
🎀❉━═══🪷═══━❉🎀
1] സൃഷ്ടികാളി
2] രക്തകാളി
3] സ്ഥിതി നാശക കാളി (ചില ഗ്രന്ഥങ്ങൾ സംഹാര കാളി എന്ന് പറയുന്നു)
4] യമകാളി
5] സംഹാരകാളി
6] മൃത്യുകാളി
7] ഭദ്രകാളി
8] മാർത്താണ്ഡകാളി
9] പരമാർക്കകാളി
10] കാലാഗ്നി രുദ്രകാളി
11] മഹാ കാലകാളി
12 ] മഹാകാലഘോര ചണ്ഡകാളി
എന്നിവയാണ് ദ്വാദശ കാളികൾ പ്രമാണം "കാളി ക്രമ പദ്ധതി" ആണ് ഇവയുടെ ക്രമം സ്ഥിതി ക്രമം ആയിട്ടാണ് ഈ ഭാവങ്ങളുടെ ഭൈരവൻ മന്ദന ഭൈരവൻ ആകുന്നു.
ഏക വിംശതി കാളി (21 കാളി)
🎀❉━═══🪷═══━❉🎀
1] സൃഷ്ടികാളി
2] സ്ഥിതികാളി
3] സംഹാരകാളി
4] ധനകാളി
5] സിദ്ധകാളി
6] ഘോരകാളി
7] ഉഗ്രകാളി
8] അഥർവ്വനകാളി
9] ഉഗ്ര പ്രഭകാളി
10] പഞ്ച മുഖികാളി
11] കാളി രുദ്രകാളി
12] കാലാഗ്നികാളി
13] ത്രൈലോക്യ മോഹനകാളി
14] ഖേചരീകാളി
15] ഭൈരവികാളി
16] ദക്ഷിണകാളി
17] ഗുഹ്യകാളി
18] ഹംസകാളി
19] മേധാകാളി
20] കാലസങ്കർഷിണി
21] മഹാകാളി
എന്നിവ ആകുന്നു പ്രമാണം ."മഹാ കാളി തന്ത്രം" സംഹാര ക്രമം ആയിട്ടാണ് ജപം ഉഗ്ര ഭൈരവൻ ആകുന്നു ഭൈരവ സങ്കൽപം.
തുടർന്ന് മഹാ കാളി മാത്രം ജപിക്കുന്നത് തുരീയം ആയിട്ടും
കാലസംഘർഷിണി മാത്രം ആയിട്ട് യോഗ മാർഗമായി ജപം ചെയ്യുന്നത് തുരീയാതീതം ആയിട്ടും ആണ് ജപം. മഹാ കാളി ശാംഭവി മുദ്രയിലും സംഘർഷിണി ഖേചരിയിലും ആകുന്നു ജപം ചെയ്യേണ്ടത്. ക്രമ പദ്ധതിയിൽ ഓരോ കാളി സാധനയ്ക് ഒരു മുദ്രയും ആസനവും പറഞ്ഞിട്ടുണ്ട്. ബാക്കിയുള്ളത് ഗുരുവേദ്യമാണ്.
രുരുജിത് സങ്കൽപ്പത്തിലുള്ള മറ്റൊരു കാളി ഉപാസനയുമുണ്ട്. ഇതിനുള്ള വിധികൾ പറയുന്നത് ശേഷ സമുച്ചയം എന്ന ഗ്രന്ഥത്തിലാണ്. (തന്ത്ര സമുച്ചയത്തിൽ പറയാത്ത മൂർത്തികളുടെ ക്രിയാ പദ്ധതിയാണ് ശേഷ സമുച്ചയത്തിൽ ഉള്ളത്.). ഭഗവാന്റെ പത്നിയായി സങ്കൽപ്പിക്കുന്ന കാളീ ഭാവാണ് രുരുജിത് . രുരു എന്ന അസുരനെ വധിക്കാനായാണ് ഈ ഭാവത്തിൽ ഭദ്രകകാളി അവതാരം ഉണ്ടായത്.
കാശ്മീരി, ടിബറ്റൻ,ബംഗാളി, കേരള എന്നിങ്ങനെ നാലു തന്ത്രങ്ങളാണ് ഉള്ളത്. ഇതിൽ കശ്മീരി തന്ത്രത്തിൽ കാലസംഘർഷിണി എന്ന സങ്കൽപത്തിൽ ആരാധിക്കുന്ന ഭഗവതിയും ഇതുതന്നെയാണ്. കേരളത്തിലെ 13 കാവുകളിൽ രുരുജിത് വിതാനത്തിലുള്ള ഭദ്രകാളി പ്രതിഷ്ഠയാണുള്ളത്.
എല്ലാവരുടെയും പ്രശ്നമാണ് ഭയം. എന്ത് കാര്യത്തിൽ നിന്നും പിന്നോട്ടു വലിക്കുന്ന ഏറ്റവും മോശപ്പെട്ട വികാരങ്ങളിൽ ഒന്നാണ് ഇത്. ഭയം ബാധിക്കുന്ന മനസിന് നല്ല കാര്യങ്ങളൊന്നും ചെയ്യാൻ കഴിയില്ല. ഭയന്ന് മാറി നിൽക്കും. അങ്ങനെ നിഷ്ക്രിയരായി ജീവിതത്തിൽ തിരിച്ചടികൾ നേരിടുന്നവരാണ് ഏറെയും. ദുർചിന്തകൾ ശക്തമാകുന്നതിനെ തുടർന്നാണ് ഭയം മനസിനെ ഗ്രസിക്കുന്നത്. അകാരണമായ ഭയം ആശങ്കയിൽ തുടങ്ങി ഉത്കണ്ഠയും ആധിയും വ്യാധിയുമായി മാറും. ഈ ദുർവികാരം മനുഷ്യരുടെ ശുഭാപ്തി വിശ്വാസമെല്ലാം കെടുത്തിക്കളയും.
ഇതിൽ നിന്നും മുക്തി നേടുന്നിത് ഒരു മാർഗ്ഗമേയുള്ളു. ശുഭചിന്തകൾ ശക്തമാക്കി മനോധൈര്യം വർദ്ധിപ്പിക്കുക. അതിനുള്ള ഏറ്റവും ഫലമായ അനുഷ്ഠാനപരമായ മാഗ്ഗമാണ് ഭദ്രകാളീ ഉപാസന.
ഓരോ ഭദ്രകാളിക്കും ഉപാസന പദ്ധതികൾ വേറെയാണ്. എങ്കിലും പരക്കെ ആരാധിക്കുന്നത് ദാരികനെ വധിച്ച ഭദ്രകാളിയെയാണ്. കേരളത്തിന്റെ താന്ത്രിക പാരമ്പര്യത്തിന് കാളി ഉപാസന വഹിച്ച പങ്ക് വലുതാണ്. ഹിന്ദുക്കളിൽ എല്ലാ വിഭാഗത്തിലും പെട്ടവർ കാളി ഉപാസന ചെയ്തിരുന്നുവെന്നാണ് കരുതപ്പെടുന്നത്. സുരക്ഷികതത്വത്തിനെ നൽകുന്നവളാണ് ഭദ്രകാളി.
താത്കാലിക ലാഭത്തിനുവേണ്ടി മാത്രം ഉപാസന നടത്താൻ പാടില്ല. മഹാകാളിയെ ഉപാസിക്കുന്നവർക്ക് അസാധ്യമെന്ന് തോന്നുന്നതെല്ലാം സാധ്യമായി തീരുമെന്നാണ് വിശ്വാസം. ആകാശമായാണ് ചിലയിടത്ത് കാളിയെ ഉപമിക്കുന്നത്. കാളി തത്വം അത്ര വിസ്തൃതമാണ്. സമ്പ്രദായ ഭേദങ്ങൾ നിരവധിയുണ്ട്. സിദ്ധി നേടാൻ വീരഭാവനയാണ് വേണ്ടത്. ഭക്തിഭാവത്തിലും ആരാധിക്കാം. ഭദ്രകാളിയെ ആരാധിക്കുകയും പ്രീതിപ്പെടുത്തുകയും ചെയ്യുന്നവർക്ക് ദേവിയുടെ അനുഗ്രഹം ഉണ്ടാകുമെന്നാണ് വിശ്വാസം.
ദാരികജിത്തായ ഭദ്രകാളിയെ ഉപാസിക്കാനുള്ള വഴി
🎀❉━═══🪷═══━❉🎀
ഉത്തമനായ ഗുരുവിൽ നിന്ന് ധ്യാന ശ്ലോകവും മൂലമന്ത്രവും ഉപദേശിച്ച് നേടിയതിന് ശേഷം ഈ ഉപാസന വിധിയിലേക്ക് കടക്കാം. ഉത്തമനായ ഗുരുവിനെ ലഭിച്ചില്ലെങ്കിൽ ആദിഗുരുവായ ഭഗവാൻ പരമശിവനെ ഗുരുവായി സങ്കൽപ്പിച്ച് മുലമന്ത്രം ജപിക്കാവുന്നതാണ്.
ദീക്ഷദാനം ചെയ്യുവാൻ യോഗ്യനായ ഗുരുവിന്റെ ലക്ഷണങ്ങൾ മന്ത്രശാസ്ര്തത്തിൽ വിശദീകരിക്കുന്നുണ്ട്‌. ഉപദേശിച്ചതുകൊണ്ടു മാത്രം ഒരുവനും ഗുരുവാകുന്നില്ല. ഇന്ദ്രീയജയം നേടിയവനും സത്യവാദിയും ദയാലുവും ശിഷ്യന്റെ സംശയങ്ങൾ ദൂരീകരിക്കാൻ കഴിവുള്ളവനും ശാന്തചിത്തനും വൈദിക ക്രിയകളിൽ സമർത്ഥനും മന്ത്രസിദ്ധി നേടിയവനും നിത്യകർമ്മങ്ങൾ അനുഷ്‌ഠിക്കുന്നവനും ആരോഹിയും സ്വസ്ഥലത്തുതന്നെ വസിക്കുന്നവനും ആയിരിക്കണം ഗുരു. അതുപോലെ ശിഷ്യനും ചില ഗുണങ്ങൾ വേണമെന്ന്‌ നിഷ്‌കർഷിച്ചിട്ടുണ്ട്‌. അതിൽ ഗുരുഭക്തി തന്നെ ഏറ്റവും മുഖ്യം. ഗുരു ഈശ്വരൻ തന്നെയാണെന്നും ഗുരുവിന്റെ ഉപദേശം വേദവാക്യംപോലെയാണെന്നും ഗുരുകടാക്ഷം കൊണ്ട് തനിക്ക്‌ സമസ്തവും സിദ്ധിക്കുമെന്നും പൂർണ്ണവിശ്വാസം ശിഷ്യനും വേണം. ഗുരുവിൽ ശിഷ്യനുള്ള പൂർണ്ണവിശ്വാസം മന്ത്രോപാസനയുടെ ഫലസിദ്ധിക്ക്‌ അനിവാര്യമാണ്‌. ആ വിശ്വാസത്തിന്‌ ഇളക്കം തട്ടുന്നത് അപകടവുമാണ്‌. അച്ചടക്കം, വിനയം, ഈശ്വരവിശ്വാസം, ഗുരുശുശ്രൂഷ, മാതാപിതാക്കളിൽ ഭക്തി ആദിയായവയും ശിഷ്യനിൽ അവശ്യം ഉണ്ടായിരിക്കേണ്ട ഗുണങ്ങളാണ്‌.
മനഃശുദ്ധി, ഏകാഗ്രത, ശ്രദ്ധ, ഭക്തി, ദാഹം, വിശ്വാസം, ഇവയോടുകൂടി ജപവും, മന്ത്രവും, ധ്യാനവും ചെയ്താൽ വ്യക്തിയുടെ ജന്മാന്തരങ്ങളിലെ പാപം നശിച്ച്‌ മോക്ഷത്തിനുള്ള വഴി ഉണ്ടാകും.
പഥ്യമായി മൂന്നുകോടി നാമം ജപിച്ചാൽ നമ്മുടെ കൈയ്യിലുള്ള രേഖകൾ മാറി വരുന്നതായി കാണാം. ജാതകത്തിൽ ലഗ്നം, ധനം തുടങ്ങി 12 ഭാവങ്ങളാണുള്ളത്‌. ഈ ദ്വാദശഭാവങ്ങൾക്കും നാമജപം കൊണ്ട് ശുദ്ധിവരുന്നതാണ്‌. പഥ്യാചരണത്തോടെ മൂന്നുകോടി ജപം നടത്തിയ ആളിന്‌ ഒരിക്കലും ദാരിദ്ര്യമുണ്ടാകുന്നതല്ല. ധനസ്ഥാനത്ത്‌ ശുദ്ധി ഉണ്ടാവുകയും ചെയ്യും. കല്ലും മുള്ളും നിറഞ്ഞ ഒരു പാതയിൽകൂടി നടക്കുന്ന പഥികന്‌ പാദരക്ഷകൾ ആശ്വാസം നൽകുന്നതുപോലെ നാമജപം ജീവിതയാത്രയിൽ അനുഭവിക്കേണ്ടിവരുന്ന ദുഃഖങ്ങളിൽ നിന്നും ഒരു കവചംപോലെ ശാന്തി നൽകുന്നു. അതുപോലെ മനസ്സിന്‌ ശുദ്ധി നൽകുന്നതിന്‌ നാമജപം പോലെ ഫലപ്രദമായ മറ്റൊരു മാർഗ്ഗമില്ല. യജ്ഞം, ദാനം, പൂജ തുടങ്ങിയവ അനുഷ്‌ഠിച്ചാൽ നമ്മുടെ പുണ്യം വർദ്ധിക്കുന്നു. എന്നാൽ പാപം ചെയ്യാതിരിക്കുക എന്നത് പുണ്യകർമ്മങ്ങൾ അനുഷഠിക്കുന്നതിനേക്കാൾ ശ്രമകരമാണ്‌.
ഏത് മന്ത്രത്തിനും ഋഷി, ദേവതാ, ഛന്ദസ് എന്നിവയുണ്ട്‌. മന്ത്രം ആദ്യമായി ദർശിച്ച ഗുരുവാണ്‌ ഋഷി. മന്ത്രത്തിലൂടെ ഭജിക്കപ്പെടുന്നത്‌ ഏതു ശക്തിയാണോ അതു ദേവത, ഉച്ചാരണരീതി വ്യക്തമാക്കുന്നത്‌ ഛന്ദസ്.
ബീജാക്ഷരങ്ങൾ
🎀❉━═══🪷═══━❉🎀
ഇത് ദേവതാശക്തി നിറഞ്ഞുനിൽക്കുന്ന സൂക്ഷ്മമായ ശബ്ദകണികകളാണ്‌. ഓരോ ദേവതയ്‌ക്കും പ്രത്യേകം ബീജാക്ഷരങ്ങളുണ്ട്‌. ഈ അക്ഷരങ്ങളെ ഒരു വിത്തിനോടുപമിക്കാം. ഉപാസനയിലൂടെ വിത്തിലെ ദേവതാശക്തി വളർന്നുവരുന്നു. ഈ ബീജാക്ഷരങ്ങൾ മന്ത്രത്തിന്‌ പ്രത്യേകശക്തി പ്രദാനം ചെയുന്നു.
ചില പ്രധാന ബീജാക്ഷരങ്ങളും അവയുടെ അർത്ഥവും ചുവടെ ചേർക്കുന്നു.
🎀❉━═══🪷═══━❉🎀
ഓം – പ്രണവം, പരബ്രഹ്‌മപ്രതീകം
ശ്രീം – ഐശ്വര്യം, മഹാലക്ഷ്മിയെ കുറിക്കുന്നു
ഹ്രീം – ലജ്ജ, ശാലീനത, മഹാമായയുടേയും ഭുവനേശ്വരിയുടേയും പ്രതീകം, ശക്തിബീജം
ഹ – ശിവൻ
ഇം – വിഷ്ണു
ക്ലിം – കാമബീജം, പ്രേമം, ഭോഗം, അനുഭൂതി
ഐം – സരസ്വതിയുടെ ബീജമന്ത്രം
ഹും – സംസാര സാഗരം തരണം ചെയ്യൽ
ക്രം – ആത്മസമർപ്പണം
ഗം – ഗണേശബീജം
ദും – ദുർഗ്ഗാബീജം
ഹം – ഹനുമാൻ, ആകാശബീജം
ഇഷ്ടദേവത
🎀❉━═══🪷═══━❉🎀
ലഗ്നാധിപൻ അഞ്ചിൽ അഞ്ചാം ഭാവാധിപനോടൊപ്പം നിൽക്കുന്നുവെന്ന്‌ കരുതുക. ഒൻപതാം ഭാവാധിപൻ, ഒൻപതിൽ നിൽക്കുന്ന ഗ്രഹം എന്നിവയേക്കാൾ ബലം അഞ്ചാം ഭാവാധിപന്‌ ഉണ്ടെന്നു കരുതുക. അപ്പോൾ അഞ്ചാം ഭാവാധിപനു വിധിച്ചിട്ടുള്ള ദേവതായായിരിക്കും ആ വ്യക്തിയുടെ ഇഷ്ടദേവത. കഴിഞ്ഞ ജന്മത്തിൽ ഒരു വ്യക്തി ഉപാസിച്ചിരുന്ന ദേവതാ സങ്കല്പങ്ങൾ സംസ്‌കാര രൂപത്തിൽ നമ്മുടെ ഉപബോധ മനസിൽ ഉണ്ടാവുമെന്ന്‌ ഒരു സിദ്ധാന്തമുണ്ട്‌. ആ ദേവതാ സങ്കല്പത്തോട്‌ ഈ ജന്മത്തിൽ നമുക്ക് ഒരു ചായ്‌വും ഉണ്ടാവും.
ഉപാസന ചെയ്യുമ്പോൾ
ഉപാസന മൂർത്തിയിൽ അകമഴിഞ്ഞ വിശ്വാസം നിർബന്ധമാണ്. സർവ ഐശ്വര്യങ്ങളും ശത്രുനാശവുമാണ് ഉപാസന ഫലം.
ഈ ജന്മത്തിൽ ചെയ്യുന്ന കർമ്മത്തിനും ആർജ്ജിക്കുന്ന അറിവിനും ശേഷിക്കുന്ന ആഗ്രഹങ്ങൾക്കും അനുസൂതമായി ഒരുവൻ പുനർജന്മത്തിനു വിധേയനാകുന്നു. ശാസ്ത്രത്തിനും യുക്തിക്കും വിശദീകരിക്കാൻ കഴിയാത്ത പല സമസ്യകൾക്കും ഈ സിദ്ധാന്തം ഉത്തരം നൽകുന്നുണ്ട്‌.
ജ്ഞാനയോഗം, രാജയോഗം, കർമ്മയോളം, ഭക്തിയോഗം തുടങ്ങിയ ഈശ്വര സാക്ഷാത്‌കാര മാർഗ്ഗങ്ങളുള്ളതിൽ ഭക്തിയോഗമാണ്‌ ലൗകിക ജീവിതം നയിക്കുന്ന സാധാരണക്കാർക്ക്‌ അനുഷ്‌ഠാനുക്ഷമമായിട്ടുള്ളത്‌. നിരവധി ദേവതകളെ ഉപാസിക്കുന്നതിനുപകരം ഒരു ദേവതയെ തന്നെ തീവ്രമായി ഉപാസിക്കുന്നതാണ്‌ ഫലസിദ്ധിക്ക്‌ ഉത്തമം. ഒരു ദേവതയെ ഇന്നു ഭജിച്ചു ഫലം കാണാതെവന്നാൽ മറ്റൊരു ദേവതയെ നാളെ ഭജിക്കുന്നു. ഇത് ഫലപ്രദമായ ഒരു പദ്ധതിയല്ല. ഇഷ്ടദേവതയെ ആദ്യമായി കണ്ടുപിടിച്ച്‌ ആ ദേവതയെ നിരന്തരമായി ഭജിക്കുക ഇതാണ് ഉത്തമമാർഗ്ഗം.
സതയാ ശ്രദ്ധയായുക്താം തസ്യാരാധലമിഹിതേ
ലഭതേയതതഃ കാമാൻ മയൈവ വിഹിതാൻ ഹിതാൻ
ശ്രദ്ധയോടെ ഇഷ്ടദേവാരാധന ചെയ്യുന്നവർക്ക് അവരുടെ ആഗ്രഹമനുസരിച്ചിട്ടുള്ള ഫലങ്ങൾ ലഭിക്കുന്നു എന്നതാണ് സൂചിപ്പിക്കുന്നത്. ഇതിൽ നിന്നെല്ലാം വ്യക്തമാകുന്നത്‌ ഇഷ്ടദേവാരാധന ഒരു വ്യക്തിയെ സംബന്ധിച്ചിടത്തോളം ഏറ്റവും ഉത്തമവും ഐശ്വര്യപ്രദവുമായ ഒരു അനുഷ്‌ഠാനമത്രെ.
മനസ്സിനെ ഏകാഗ്രമാക്കി അതിനെ ഈശ്വര സങ്കല്പത്തിൽ തന്നെ ഉറപ്പിച്ചു നിർത്തുന്നതിനുള്ള അഭ്യാസമാണ്‌ ജപം. നാമജപമായാലും മന്ത്രജപമായാലും ജപത്തിന്റെ ഉദ്ദേശം അതുതന്നെ. നിരന്തരം തുടരുന്ന ജപം ക്രമേണ മനസ്സിനെ ഏകാഗ്രമാക്കും. ആ ഏകാഗ്രത കൈവരുന്നതോടെ മനസ്സ് ഈശ്വരനിൽ അഥവാ ഇഷ്ടദേവതയിൽ ഉറച്ചുനിൽക്കുന്നു. നാമവും, രൂപവും തമ്മിൽ വേർപ്പെടുത്താൻ കഴിയാത്തവിധം ഒന്നിച്ചവയാണ്‌.
നാമം കൂടാതെ രൂപത്തേയും, രൂപം കൂടാതെ നാമത്തേയും നമുക്ക് മനസ്സിൽ കൊണ്ടുവരാൻ കഴിയില്ല. അതുപോലെ ഈശ്വരന്റെ നാമവും രൂപവും നമ്മുടെ മനസ്സിൽ തെളിയുന്നു. ആ രൂപത്തെ മനസ്സിൽ സ്മരിക്കുന്നതാണ്‌ ധ്യാനം. അതുകൊണ്ടുതന്നെ ജപവും ധ്യാനവും ഒരേ സമയം നടക്കുന്ന രണ്ടു പ്രക്രിയകളാണ്‌.
മന്ത്രം
🎀❉━═══🪷═══━❉🎀
മഹർഷിമാർ മനനം ചെയ്തുണ്ടാക്കിയതാണു മന്ത്രം
മഹാപത്മവനാന്തന്റെ കരേണാനന്തിവിഗ്രഹെ
സർണവ്വ ഭൂതഹിതേമാതഃ ഏഹ്യേഹിചരമേശ്വരി
പുരുഷാർത്ഥസിദ്ധി ധർമ്മം, അർത്ഥം, കാമം, മോക്ഷം എന്നിവയാണ് പുരുഷാർത്ഥങ്ങൾ. നമ്മുടെ പ്രവൃത്തി ശുദ്ധമാകണമെങ്കിൽ നമുക്ക് ധാർമ്മികബോധം കൂടിയേ കഴിയൂ. ധർമ്മത്തിന്റെ വഴിലൂടെയാവണം നമ്മുടെ പ്രവൃത്തി. ജീവിതം മുന്നോട്ടു കൊണ്ടുപോകാൻ ആവശ്യമായ ധനസമ്പാദനമാണ്‌ അർത്ഥം കൊണ്ട് ലക്ഷ്യമാക്കുന്നത്‌. കാമമെന്നാൽ ആഗ്രഹങ്ങൾ എന്നാണർത്ഥം. ഇത് വൈകാരികമായ സന്തോഷങ്ങളെയാണ്‌ ലക്ഷ്യമിടുന്നത്‌. മോക്ഷം എന്ന വാക്കിന്റെ അർത്ഥം സ്വതന്ത്രം. എന്നാൽ പുരുഷാർത്ഥങ്ങളിൽ ഏറ്റവും മഹത്തായഫലം തരുന്നത്‌ മോക്ഷമാണ്‌. ധാർമ്മിക നിയമങ്ങൾ അനുസരിച്ച് കൊണ്ട് ധനം സമ്പാദിച്ച്‌ ആഗ്രഹങ്ങൾ പൂർത്തീകരിച്ച്‌ മോക്ഷം പ്രാപിക്കുക എന്നതാണ് പുരുഷാർത്ഥം.
പരമമായ ലക്ഷ്യം മോക്ഷം പ്രാപിക്കുകയാണ്‌. മോക്ഷപ്രാപ്തിക്ക്‌ സഹായകമായ ഘടകങ്ങളാണ്‌ മറ്റു മൂന്നും. എന്നാൽ പലപ്പോഴും മനുഷ്യൻ ധർമ്മത്തിൽ നിന്ന് വ്യതിചലിച്ചുകൊണ്ട്‌ സഞ്ചരിക്കുന്നു.
' ഈശ്വര: ഋഷി
പങ്തി: ഛന്ദസ്
ശക്തിഭൈരവി ദേവത'
ധ്യാനം
🎀❉━═══🪷═══━❉🎀
' ഓം കാളിം മേഘസമപ്രഭാം ത്രിനയനാം
വേതാള കണ്ഠസ്ഥിതാം
ഖഡ്ഗം ഖേട കപാല ദാരുക ശിരഃ
കൃത്വാ കരാഗ്രേ ഷുച
ഭൂതപ്രേതപിശാചമാതൃസഹിതാം
മുണ്ഡസ്രജാലംകൃതാം
വന്ദേ ദുഷ്ടമസൂരികാദി വിപദാം
സംഹാരിണീമീശ്വരീം'
ധ്യാന ശ്ലോകത്തിന്റെ അർത്ഥം ഇങ്ങനെ:
🎀❉━═══🪷═══━❉🎀
കാർമേഘ നിറമുളള , ത്രിനയനങ്ങളുള്ള, വേതാളത്തിന്റെ കഴുത്തിൽ ഇരിക്കുന്ന, വാൾ , പരിച, തലയോട്ടി , ദാരിക ശിരസ് എന്നിവ ധരിച്ച , ഭൂതങ്ങൾ, പ്രേതങ്ങൾ, പിശാചുകൾ, മാതൃക്കൾ എന്നിവയോടു കൂടിയ, മനുഷ്യ ശിരസുകൾ കോർത്ത മാല അണിഞ്ഞ വസൂരി തുടങ്ങിയ മഹാമാരികളെ നശിപ്പിക്കുന്ന സർവേശ്വരിയായ ഭദ്രകാളിയെ നമിക്കുന്നു.
മൂലമന്ത്രം
🎀❉━═══🪷═══━❉🎀
ഓം ഐം ക്ലീം സൗഃ ഹ്രീം ഭദ്രകാള്യെ നമഃ'
ചൊല്ലേണ്ട വിധം
🎀❉━═══🪷═══━❉🎀
ആദ്യം ഋഷി, ഛന്ദസ്, ദേവത എന്നിവയും ധ്യാന ശ്ലോകവും ഒരുതവണ ജപിച്ചതിന് ശേഷം മൂലമന്ത്രം ജപിക്കണം. കാളി ഉപാസനയുടെ ഭാഗമായി സ്ത്രീകളോട് ആദരവോടെ പെരുമാറണം. മന,ശരീര ശുദ്ധി അത്യന്താപേക്ഷിതമാണ്. ബ്രഹ്മചര്യം നിർബന്ധമല്ലെങ്കിലും അനുഷ്ടിക്കുന്നതാണ് അഭികാമ്യം.
1001 അല്ലെങ്കിൽ 101 എന്നീ സംഖ്യകളിൽ ഉപാസനക്കായി ദിനവും ജപിക്കണം.
ഏതൊരു ദേവതയെ ഉപാസിക്കുന്നോ, ആ ദേവതയില് അകമഴിഞ്ഞ വിശ്വാസം വെച്ചുപുലര്ത്തണം. ഒന്നും ആ ദേവതയോട് ആജ്ഞാപിക്കരുത്;പക്ഷേ, അപേക്ഷിക്കാം. ആ ദേവത അറിയാതെ നിങ്ങള്ക്ക് ഒന്നും ചെയ്യാനാകില്ല. അഥവാ നിങ്ങള് യാതൊന്നും ചെയ്യില്ല. അത്രയ്ക്കും അതിഗാഢമായ ഒരു ഹൃദയബന്ധം നിങ്ങളും ആ ഉപാസനാമൂര്ത്തിയുമായി വളര്ന്നുവരും.
ഭദ്രകാളിയെ കാലങ്ങളായി കുടുംബപരമായി ആരാധിക്കുന്നവര്, മകയിരം, ചിത്തിര, അവിട്ടം നക്ഷത്രക്കാര്,ജാതകത്തില് ചൊവ്വ നില്ക്കുന്നത് യുഗ്മരാശിയില് ആയവര്, ചൊവ്വ ഇരുപത്തിരണ്ടാം ദ്രേക്കാണാധിപന് ആയി വരുന്നവര്, ജാതകത്തില് കാരകാംശലഗ്നം വൃശ്ചികം ആയി വരുന്നവര്, ചൊവ്വ കര്ക്കടകത്തില് നില്ക്കുന്നവര് അഞ്ചാംഭാവത്തില് ബലവാനായി ചൊവ്വ നില്ക്കുന്നവര്, ചൊവ്വ മകരത്തില് നില്ക്കുന്നവര്, ചൊവ്വ വൃശ്ചികത്തില് നില്ക്കുന്നവര്, ചൊവ്വ വര്ഗ്ഗോത്തമത്തില് നില്ക്കുന്നവര്, ഗ്രാമക്ഷേത്രത്തില് ഭദ്രകാളിയെ പ്രധാനവിഗ്രഹമായി ആരാധിക്കന്ന വിശ്വാസമുള്ള ഗ്രാമീണര്, ഭദ്രകാളിയെ ആരാധിക്കാന് ആഗ്രഹിക്കുന്നവര് അവര്ക്കൊക്കെയും ഭദ്രകാളിയുടെ ധ്യാനവും മൂലമന്ത്രവും ഭക്തിയോടെ ജപിക്കാവുന്നതാകുന്നു.
ധ്യാനവും മൂലമന്ത്രവും ഹൃദിസ്ഥമാക്കി, ഭദ്രകാളീക്ഷേത്രത്തില് ഭദ്രകാളിയുടെ മുന്നിൽ ഭക്തിയോടെ നിന്ന് ഒരു പ്രാവശ്യം ധ്യാനവും തുടര്ന്ന് 11 പ്രാവശ്യം മൂലമന്ത്രവും ഒന്ന് ജപിച്ചുനോക്കൂ…. മാന്യമായതും അര്ഹതയുള്ളതുമായ ഏതൊരു കാര്യവും സാധിക്കുമെന്ന് നിസ്സംശയം പറയാം
രോഗക്ലേശങ്ങൾ വേട്ടയാടുന്ന സമയത്ത് ആരാധിക്കാൻ പറ്റിയ അത്യുഗ്രമൂർത്തിയാണ് ശ്രീഭദ്ര. ചൊവ്വാദോഷം അനുഭവിക്കുന്നവരും മകയിരം, ചിത്തിര, അവിട്ടം നക്ഷത്രത്തിൽ ജനിച്ചവരുംമേടം രാശിക്കാരായ അശ്വതി, ഭരണി, കാർത്തിക ആദ്യ കാൽ, വൃശ്ചികക്കൂറുകാരായ വിശാഖം അവസാന കാൽ, അനിഴം, കേട്ട നക്ഷത്രക്കാരും കണ്ടക ശനിദോഷം അനുഭവിക്കുന്നവരും ഭദ്രകാളിയെ ഭജിച്ചാൽ ദുരിതങ്ങൾ അകന്ന് ഭാഗ്യാനുഭവങ്ങൾ വർദ്ധിക്കും. ഭദ്രകാളി ഭജനത്തിനും ഭദ്രകാളി ക്ഷേത്ര ദർശനത്തിനും ഏറ്റവും നല്ല ദിവസം ചൊവ്വാഴ്ചയാണ്. അമ്മയോട് എന്തും അപേക്ഷിക്കാം; ഒന്നും അജ്ഞാപിക്കരുത്. ഭദ്രകാളിയെ അരാധിക്കുന്നവർ എല്ലാവരോടും ആദരവോടെ പെരുമാറണം.സ്ത്രീകളെ ബഹുമാനിക്കണം. കളവ് പറയരുത്. മന: ശുദ്ധിയും ശരീര ശുദ്ധിയും ആവശ്യമാണ്.
കരിങ്കാളി മന്ത്രം
🎀❉━═══🪷═══━❉🎀
ഖഡ്ഗം കപാലം ത്രിശിഖം ത്രിനേത്രം
വജ്രം ദധാനാം ധൃത ഭീമദംഷ്ട്രാം
അനേക ശത്രോർ ഹൃദയംഖനന്തീ
കൃഷ്‌ണേന കാളീം സതതം ഭജാമി
വാളും തലയോടും ത്രിശൂലവുമേന്തിയ, മൂന്ന് നേത്രങ്ങളുള്ള, ഭയപ്പെടുത്തുന്ന ദംഷ്ട്രകളുള്ള, എണ്ണമറ്റ ശത്രുക്കളെ നശിപ്പിക്കുന്ന, കൃഷ്ണ വർണ്ണയായ രൂപത്തിൽ കാളീ ഭഗവതിയെ ഹൃദയത്തിൽ പ്രതിഷ്ഠിച്ച് അനുസ്യൂതം ഭജിക്കുക – എല്ലാ ഭയപ്പാടുകളും അകന്നു പോകുക തന്നെ ചെയ്യും. കാളീ ഭഗവതിക്ക് സുപ്രധാനമായ ഭരണി നക്ഷത്രം, അമാവാസി തിഥി, ചൊവ്വാഴ്ച ദിവസം തുടങ്ങിയവ കാളീ ഉപാസനയ്ക്ക് അതിവിശേഷമാണ്. ഇതിൽ ഏതെങ്കിലും ദിവസം ഉപാസന തുടങ്ങാം. എല്ലാ ദിവസവും സന്ധ്യയ്ക്ക് ജപിക്കുക. നിത്യവും 3 പ്രാവശ്യമെങ്കിലും ജപിക്കണം . കുറഞ്ഞത് 21,36 തുടങ്ങിയ ദിനങ്ങളിൽ തുടർച്ചയായി ജപിക്കുക. നിത്യവും ജപിക്കുവാൻ കഴിയുമെങ്കിൽ കൂടുതൽ നല്ലത്. മകരം, കുംഭം, മീനം മാസങ്ങളിലെ ഭരണിനക്ഷത്ര ദിവസം ഭദ്രകാളീ ഉപാസന ഏറെ പ്രധാനമാണ്. ഈ ദിവസങ്ങളിലെ കാളീ ഉപാസനയ്ക്ക് വിശേഷഫലം അതി വേഗം ലഭിക്കുമെന്ന് അനുഭവസ്ഥർ പറയുന്നു.
കറുത്ത നിറമുള്ളവൾ എന്നാണ് കാളിയെ പറയുന്നത് എങ്കിലും കറുപ്പും നീലയും കലർന്ന നിറമുള്ളവളായാണ് കാളിയുടെ യഥാർത്ഥ രൂപ സങ്കല്പം. കാളീ മേഘസമപ്രഭാം എന്നാണ് കാളിയുടെ ധ്യാനം ആരംഭിക്കുന്നതെന്ന് ഓർമ്മിക്കുക. ഭദ്ര എന്ന പദം ഭഗവതിയുടെ വിശേഷണമായി ചാർത്തപ്പെടുമ്പോൾ എല്ലാ മംഗളങ്ങളും പ്രദാനം ചെയ്യുന്ന ദേവിയായി കാളിയെ വാഴ്ത്തുകയാണ്. മറ്റു സ്ഥലങ്ങളിലെല്ലാം ഘോരഭാവത്തിൽ കാളിയെ വാഴ്ത്തുമ്പോൾ കേരളീയർക്ക് കാളി ഭദ്രയാണ്. മംഗള വരദായിനിയാണ്. അഭദ്രങ്ങൾ അകറ്റി കാത്തു രക്ഷിക്കുന്ന അമ്മയാണ്. കപലിനി എന്ന് അമ്മയെ ഭജിക്കുന്നത് തലയോട് കൈയിൽ ധരിക്കുന്നതിനാൽ ആണ്. ദാരുകനെ നിഗ്രഹിച്ച ഭഗവതി അവന്റെ തലയോടാണ് കൈയിൽ. ഏന്തുന്നത് ഭദ്രകാളിയുടെ
ധ്യാനസങ്കല്പങ്ങളിലെല്ലാം ദേവി കപാലധാരിണി ആണ്.
കരിങ്കാളി മന്ത്രം പോലെ ഭയം മാറുന്നതിന് ഉത്തമമാണ്
ഭദ്രകാളി ഗായത്രി ജപം. നിത്യേന രാവിലെയും
വൈകിട്ടും 56 തവണ വീതം ചൊല്ലുക. ഭയപ്പാടുകൾ മാറുന്നതിനും ടെൻഷനും അകലുന്നതിനും ശാന്തിയും സമാധാനവും ഉണ്ടാകുന്നതിനും ഉറക്കത്തിൽ ദുസ്വപ്നങ്ങൾ കാണാതിരിക്കുന്നതിനും അത്യുത്തമം.
ഭദ്രകാളി ഗായത്രി
🎀❉━═══🪷═══━❉🎀
ഓം രുദ്ര സുതായൈ വിദ്മഹേ
ശൂല ഹസ്തായൈ ധീമഹി
തന്നോ: കാളി പ്രചോദയാത്
ജീവിതത്തെ മാറ്റിമറിക്കാൻ കഴിയുന്ന ശക്തിയുള്ള പുണ്യാക്ഷരങ്ങളാണ് മന്ത്രങ്ങൾ. നല്ല അന്തരീക്ഷത്തിൽശരിയായ സ്പന്ദനങ്ങളിൽ, ജപിക്കുന്ന മന്ത്രങ്ങൾ നമ്മുടെ മനസിനെ മാത്രമല്ല ഇന്ദ്രിയങ്ങളെയും ശാന്തമാക്കും. ശക്തിയുള്ള ഒരു മന്ത്രം ജപിക്കുമ്പോൾ ലഭിക്കുന്ന ശാന്തി മറ്റൊന്നിനും തരാനാകില്ല. എന്നാൽ എങ്ങനെയാണ് മന്ത്രം ജപിക്കേണ്ടതെന്ന് പലർക്കും അറിയില്ല. വ്യത്യസ്തമായ ആഗ്രഹങ്ങൾ ഉള്ളിൽ വച്ചു കൊണ്ടാണ് പലരും മന്ത്രം ജപിക്കുന്നത്. ചിലർ അതിന്റെ ആത്മീയമായ പ്രാധാന്യം മനസിലാക്കി ഈശ്വര സാക്ഷാത്ക്കാരത്തിനാണ് ജപിക്കുന്നത്. ചിലർ ധ്യാനത്തിനാണ് മന്ത്രങ്ങളെ ആശ്രയിക്കുന്നത്; മറ്റ് ചിലർ ഏകാഗ്രത വർദ്ധിപ്പിക്കുന്നതിന്. എന്തിനുവേണ്ടിയായാലും ശരിയായ രീതിയിൽ ജപിച്ചാൽ മാത്രമേ ഉദ്ദേശിക്കുന്ന ഫലം ലഭിക്കൂ.എപ്പോൾ മന്ത്രം ജപിച്ചാലും ഉച്ചാരണശുദ്ധിയും പരസ്പര ബന്ധവും ഉറപ്പാക്കുക വേണം. തെറ്റായ ഉച്ചാരണം ഗുണത്തെക്കാൾ ദോഷം ചെയ്യുമെന്ന് മനസിലാക്കണം. കഠിനമായ പദങ്ങൾ ജപിക്കേണ്ടിവരുമ്പോൾ സംശയമുണ്ടാകും; അത് തീർക്കാൻ പണ്ഡിതന്മാരായ നല്ല ആചാര്യന്മാരെ സമീപിക്കാൻ മടിക്കാണിക്കരുത്.
തുടക്കത്തിൽ ലളിതമായ മന്ത്രങ്ങൾ അക്ഷരചേർച്ചയും അർത്ഥവും മനസിലാക്കി ജപിച്ചു തുടങ്ങുന്നതാണ് ഏറ്റവും നല്ലത്. ഒരോ മന്ത്രവും ചൊല്ലി ബലപ്പെടുത്താൻ അതിന് പറഞ്ഞിട്ടുള്ളത്ര തവണ ജപിക്കണം. ഇതിനെ മന്ത്രസിദ്ധി വരുത്തുക എന്നാണ് പറയുന്നത്. ഒരു രാത്രി വെളുക്കുമ്പോൾ ആർക്കും തന്നെ മന്ത്രസിദ്ധി ആർജ്ജിക്കാൻ കഴിയില്ല. അതിന് നല്ല സാധന വേണം. നിരന്തരം നിശ്ചിത തവണ മന്ത്രം ജപിച്ച് ബലപ്പെടുത്തായാൽ മാത്രമേ മന്ത്രങ്ങൾ നമ്മുടെ ജീവിതത്തിൽ വരുത്തുന്ന നല്ല മാറ്റങ്ങൾ തിരിച്ചറിയാൻ കഴിയൂ. അതിന് മാസങ്ങൾ തന്നെ വേണ്ടിവരും. അത് നമ്മുടെ സാധനയുടെ ദൃഢതയെ ആശ്രയിച്ചാണിരിക്കുന്നത്. മന്ത്രം ഫലം തരുന്നില്ലെന്ന് ചിന്തിച്ച് ഇടയ്ക്ക് വച്ച് ജപം നിറുത്തരുത്; മറ്റൊരു മന്ത്രത്തെ ആശ്രയിക്കുകയും ചെയ്യരുത്. നല്ലൊരു ആചാര്യനിൽ നിന്നും മന്ത്രജപത്തെക്കുറിച്ച് മനസിലാക്കിയ ശേഷം ജപം തുടങ്ങുകയാണ് ഏറ്റവും ഉത്തമം. ജപമാല ഉപയോഗിക്കുമ്പോൾ കൈയ്യിൽ അത് ശരിയായ രീതിയിൽ എങ്ങനെ പിടിക്കണമെന്നും മറ്റും ആചാര്യൻ നിങ്ങൾക്ക് പറഞ്ഞുതരും. ആചാര്യനെ തിരഞ്ഞെടുക്കുന്ന കാര്യത്തിൽ നല്ല ശ്രദ്ധ വേണം. നാലുപേർ നല്ലതു പറയുന്ന ആചാര്യനെ മാത്രമേ തിരഞ്ഞെടുക്കാവൂ.
മന്ത്രജപത്തിന് ജപമാല വേണമെന്നൊന്നുമില്ല. വിരൽ മടക്കിയും മറ്റും ജപസംഖ്യ തിട്ടപ്പെടുത്തുവാൻ കഴിയുമെങ്കിൽ ജപമാല ആവശ്യമില്ല. എന്നാൽ ജപമാലയുള്ളത് ഏകാഗ്രത കൂട്ടുന്നതിന് നല്ലതാണ്. ജപമാല രൂദ്രാക്ഷമായിരിക്കുന്നത് ആത്മാവിനും ശരീരത്തിനും വളരെ പ്രയോജനം ചെയ്യും. മന്ത്രം ജപിക്കുമ്പോൾ കഴിയുമെങ്കിൽ കണ്ണടച്ചിരിക്കണം. അത് ഏകാഗ്രത വർദ്ധിപ്പിക്കുക മാത്രമല്ല ഓരോ മന്ത്രവും സൃഷ്ടിക്കുന്ന സ്പന്ദനങ്ങൾ ശരീരത്തിലുണ്ടാക്കുന്ന അനുഭൂതി അനുഭവിച്ചറിയുവാനും നമ്മളെ സഹായിക്കും. കണ്ണടച്ചിരിക്കുന്നത് ജപം തുടങ്ങിയാലുടൻ മനസിനെ സ്വസ്ഥമാക്കുകയും ശരീരത്തെ തപോനിദ്രയിലേക്ക് നയിക്കുകയും ചെയ്യും.
