കാർത്ത്യായനീ സ്തോത്രം

കാർത്ത്യായനീ സ്തോത്രം
         
കണ്മഷനാശിനി കാരുണ്യ ശാലിനി
നീർമ്മലരൂപിണി കൈതൊഴുന്നേൻ

കാലിണ കൈതൊഴുതീടും ജനങ്ങൾക്കു
കാലേ ഭയമൊഴിച്ചീടും നാഥേ

കിംപുരുഷന്മാരിൽ മുമ്പനും നിൻപദ
മമ്പോടുസേവിച്ചു വാണീടുന്നു

കീർത്തി പെരുത്തൊരു കാർത്ത്യയനി ദേവി!
കാൽത്തളിരെപ്പൊഴും വന്ദിക്കുന്നേൻ

കുണ്ഠത തീർത്തെന്നെ രക്ഷിച്ചുകൊള്ളണം
തണ്ടാർശരാന്തകാജയോ ദേവി!

കൂടലർ തങ്ങടെ കൂട്ടം മുടിക്കുന്ന
ക്രൂരപരാക്രമമുള്ള നാഥേ

കേല്പേറുമംബികേ മൽപാപം തീർത്തെന്നിൽ
ത്വൽപാദഭക്തി വരുത്തിടേണം

കേടുകളൊക്കെക്കളഞ്ഞരുളീടണം
കോടികടാക്ഷമരുളുമംബേ!

കൈതൊഴുതീടുന്നേൻ ചെയ്തൊരുദോഷങ്ങൾ
കൈതവമെന്നിയേ നീക്കിടേണം

കൊണ്ടൽനിറം പൂണ്ട നിന്തിരുമെയ് മമ
കണ്ടുതൊഴുവാൻ കഴിവേകണം

കോപിച്ചടുത്ത മഹിഷാസുരനായ
പാപിയെപ്പോരിൽ വധിച്ച നാഥേ

കൗതുകമെപ്പോഴും നിൻകഥചൊല്ലുവാൻ
ചേതസ്സിലെപ്പോഴും തോന്നിയ്ക്കണേ

കർത്തവ്യമെന്തെന്നു ചിത്തേ തിരിയാഞ്ഞു
മർത്ത്യരുഴലുന്നു മായയാലേ

ദുർമ്മുഖമൊക്കവേ ദൂരെയകറ്റണം
നിർമ്മലഞ്ജാനമുളവാക്കേണം

മറ്റുപിഴകൾ ഞാൻ ചെയ്തുപോയെങ്കിലും
ചെറ്റുമതുള്ളിൽക്കരുതീടൊല്ലേ

മറ്റെനിക്കാശ്രയമില്ല മഹേശ്വരീ
കുറ്റങ്ങൾ തീർത്തെന്നെ രക്ഷിക്കേണം

ആതുരഭാവം കളഞ്ഞരുളീടണ
മാദരമാർന്നെഴും തമ്പുരാട്ടീ

ദുർഗ്ഗെ ഭഗവതി ദേവീ മഹേശ്വരീ
ഭക്തപ്രിയേ ദേവീ
കൈ തൊഴുന്നേൻ