രാവണന്റെ 18 ശാപങ്ങൾ

രാവണന്റെ 18 ശാപങ്ങൾ

കമ്പരാമായണത്തിലെ വിഭീഷണന്റെ ഉപദേശമധ്യേ അദ്ദേഹമാണ് രാവണന് സിദ്ധിച്ചിട്ടുള്ള ആപൽബീജങ്ങളായ 18 ഘോരാശാപങ്ങളെക്കുറിച്ചു കഥിക്കുന്നത് . അതിനു പരിഹാരവും വിഭീഷണൻ പറയുകയുണ്ടായി പക്ഷെ രാവണൻ ഇത് സ്വീകരിച്ചില്ല. അവയെ കുറിച്ച് ഒന്ന് നോക്കാം..

1. നളകൂബര ശാപം
🔥●●●ॐ▬▬▬࿗▬▬▬ॐ●●●🔥
നമ്മുടെയൊക്കെ ജ്യേഷ്ഠനായ കുബേരദേവന്റെ പുത്രനായ നളകൂബരന്റെ ധർമ്മപത്നിയായ രംഭാദേവിയെ അവിടുന്നു ഒരു യാത്രയ്ക്കിടയിൽ കടന്നുപിടിച്ചു ബലാൽ കാമപൂർത്തി വരുത്തുകയുണ്ടായി . ആ സമയം അങ്ങയുടെ കൂടി പുത്രതുല്യനായ നളകൂബരദേവൻ "നിന്റെ പത്തു തലയും ഏഴേഴായി പൊട്ടിത്തെറിച്ച് നീ മരിക്കുമെന്ന്" -ഹൃദയവേദനയോടെ അങ്ങയെ ശപിച്ചു .

2. വേദവതീ ശാപം
🔥●●●ॐ▬▬▬࿗▬▬▬ॐ●●●🔥
കുശധ്വജൻ എന്ന വിപ്രമുനിയുടെ ഏക മകളായ വേദവതി ബ്രഹ്മചര്യത്തോടെ വിഷ്ണുവിനെ പതിയായി ലഭിക്കുവാൻ തപസ്സു ചെയ്യവേ , അവളെ അങ്ങ് ബലാൽ പിടികൂടി വലിച്ചിഴച്ചു . അപ്പോൾ അവൾ , "നീയും നിന്റെ കുടുംബവും ഞാൻ കാരണം , എന്റെ പതിയാകുന്ന വിഷ്ണുവിനാൽ നാശമടയട്ടേ" -എന്ന് അങ്ങയെ ഘോരമായി ശപിച്ചു . ഇപ്പോൾ അങ്ങ് ഇവിടെ കൊണ്ടുവന്നിരിക്കുന്ന സീത ആ പഴയ വേദവതിയുടെ പുനർജന്മമാണ്‌ രാജാവേ .

3. ബ്രാഹ്മണശാപം
🔥●●●ॐ▬▬▬࿗▬▬▬ॐ●●●🔥
പരമശിവൻ അങ്ങേയ്ക്കു സമ്മാനമായി തന്ന ത്രിപുരസുന്ദരീ വിഗ്രഹം പ്രതിഷ്ഠിക്കാൻ അങ്ങ് ഒരു ബ്രാഹ്മണനെ ക്ഷണിച്ചിരുന്നു . അദ്ദേഹം വരാൻ കുറച്ചു താമസിച്ചു പോയതിനു , അങ്ങ് അദ്ദേഹത്തെ മർദ്ദിച്ച് അവശനാക്കി ഏഴു ദിവസം പച്ചവെള്ളം പോലും കൊടുക്കാതെ തടവിലിട്ടു . അതിനു അദ്ദേഹം " നിന്നെയും ഒരു മനുഷ്യൻ കര -ചരണങ്ങൾ ബന്ധിച്ച് ഏഴു ദിവസം കാരാഗൃഹത്തിൽ പൂട്ടിയിടട്ടെ "-എന്ന് ശപിച്ചു .

4. നന്ദികേശ്വര ശാപം
🔥●●●ॐ▬▬▬࿗▬▬▬ॐ●●●🔥
അങ്ങ് ഒരിക്കൽ കൈലാസ പാർശ്വത്തിൽ വച്ച് നന്ദിദേവനെ "കുരങ്ങാ" എന്ന് വിളിച്ചു അപമാനിച്ചു . അപ്പോൾ നിന്റെയും "നഗരിയുടെയും കുടുംബത്തിന്റെയും നാശം കുരങ്ങന്മാരാൽ തന്നെ സംഭവിക്കുമെന്ന്" അങ്ങയെ ശപിച്ചു . ഇപ്പോൾ ഇവിടെ വന്നിരിക്കുന്ന കുരങ്ങന്മാർ അങ്ങേയ്ക്കു നാശമുണ്ടാക്കുമെന്നാണ് എനിക്ക് തോന്നുന്നത് . നന്ദിയുടെ ശാപമനുസരിച്ചു വന്നവരാണവർ .

5. വസിഷ്ഠ ശാപം
🔥●●●ॐ▬▬▬࿗▬▬▬ॐ●●●🔥
വേദശാസ്ത്രങ്ങൾ പഠിപ്പിക്കാൻ ക്ഷണിക്കപ്പെട്ട വസിഷ്ഠമുനി അങ്ങയുടെ ആജ്ഞ നിരാകരിച്ചു . അപ്പോൾ , കുപിതനായ അവിടുന്ന് അദ്ദേഹത്തെ പിടിച്ചുകെട്ടി തടവിലിട്ടു . അപ്പോൾ സൂര്യകുലരാജാവായ കുവലാശ്വൻ അദ്ദേഹത്തെ രക്ഷിക്കുകയുണ്ടായല്ലോ . അപ്പോൾ ആ ഋഷി "സൂര്യകുലജാതരിൽ നിന്നും നിനക്കും നിന്റെ വംശത്തിനും നാശമുണ്ടാകട്ടെയെന്നു അങ്ങയെ ശപിച്ചു ". ഇപ്പോൾ നമ്മുടെ ശത്രുവായി വന്നിരിക്കുന്ന രാമൻ സൂര്യകുല രാജാവാണ് .

6. അഷ്ടാവക്ര ശാപം
🔥●●●ॐ▬▬▬࿗▬▬▬ॐ●●●🔥
അങ്ങ് ഒരിക്കൽ ശ്‌ളേഷ്മാതകത്തിൽ വച്ച് അഷ്ടാവക്രനെ കണ്ടു . അദ്ദേഹത്തിൻറെ ശരീരത്തിലെ എട്ടു വളവുകളും കണ്ടു , " ഹായ് സുന്ദരാ , നിന്റെ വളവുകൾ ഞാൻ മാറ്റിത്തരാം "-എന്ന് പറഞ്ഞുകൊണ്ട് അദ്ദേഹത്തെ ചവുട്ടി വീഴ്ത്തി . തെറിച്ചു വീണു വേദനയാൽ കരഞ്ഞ അദ്ദേഹത്തെ അങ്ങ് വീണ്ടും അപമാനിച്ചു . അപ്പോൾ അദ്ദേഹം , " നിരപരാധിയായ എന്നെ ഇങ്ങനെ ചെയ്തതുകൊണ്ട് , നിന്നെയും ചപല കപികൾ പാദാദികേശം ചവുട്ടി ഞെരിച്ച് ചതച്ചുവിടും " എന്ന് അങ്ങയെ ശപിച്ചു .

7. ദത്താത്രേയ ശാപം
🔥●●●ॐ▬▬▬࿗▬▬▬ॐ●●●🔥
ഗുരുവിനു അഭിഷേകം ചെയ്യാൻ തയ്യാറാക്കിയ തീർത്ഥ കുംഭം അങ്ങ് ദത്താത്രേയനിൽ നിന്നും പിടിച്ചു വാങ്ങി സ്വയം അഭിഷേകം ചെയ്യുകയുണ്ടായല്ലോ . അപ്പോൾ ദത്താത്രേയൻ "നിന്റെ ശിരസ്സ് വാനരന്മാർ ചവുട്ടി അശുദ്ധമാക്കട്ടെ" -എന്ന് ശപിച്ചതോർക്കുന്നില്ലേ .

8. ദ്വൈപായന ശാപം
🔥●●●ॐ▬▬▬࿗▬▬▬ॐ●●●🔥
സ്വന്തം സഹോദരിയെ കണ്മുന്നിൽ വച്ച് ഉപരോധക്രിയ നടത്തി അധരാദ്യവയവങ്ങൾ മുറിപ്പെടുത്തിയപ്പോൾ ദ്വൈപായനൻ എന്ന ബ്രാഹ്മണൻ, "നിന്റെ സോദരിയെ ഒരു മനുഷ്യൻ അംഗഭംഗപ്പെടുത്തുമെന്നും , നിന്റെ ഭാര്യയെ വാനരന്മാർ മാനഭംഗപ്പെടുത്തുമെന്നും"- അങ്ങയെ ശപിച്ചിട്ടുണ്ട് .

9. മാണ്ഡവ്യ ശാപം
🔥●●●ॐ▬▬▬࿗▬▬▬ॐ●●●🔥
അങ്ങ് മണ്ഡോദരിയുമൊന്നിച്ച് വിനോദസഞ്ചാരം ചെയ്യുമ്പോൾ മാണ്ഡവ്യൻ എന്ന മഹർഷി അങ്ങയെ കണ്ടിട്ട് വന്ദിച്ചില്ല എന്ന കാരണത്താൽ അദ്ദേഹത്തെ നിർദ്ദയമായി അങ്ങ് മർദ്ദിക്കുകയുണ്ടായി . അപ്പോൾ ആ മുനി , " നിന്നെയും ഒരു വാനരവീരൻ ഇതുപോലെ മർദ്ദിക്കും " എന്ന് അങ്ങയെ ശപിച്ചു .

10. അത്രി ശാപം
🔥●●●ॐ▬▬▬࿗▬▬▬ॐ●●●🔥
അത്രി മുനിയുടെ ധർമ്മപത്നിയെ അങ്ങ് അദ്ദേഹത്തിൻറെ മുന്നിലിട്ട് തലമുടിക്ക് പിടിച്ച് വലിച്ചിഴയ്ക്കുകയുണ്ടായല്ലോ . അപ്പോൾ , " നിന്റെ പത്നിയേയും വാനരന്മാർ വസ്ത്രമഴിച്ച് മുടിപിടിച്ച് വലിച്ച് നിന്റെ കൺമുന്നിലിട്ടു അപമാനിക്കും " എന്ന് മുനി അങ്ങയെ ശപിച്ചു .

11. നാരദ ശാപം
🔥●●●ॐ▬▬▬࿗▬▬▬ॐ●●●🔥
ഓംകാരത്തിന്റെ അർത്ഥം പറഞ്ഞുകൊടുക്കാത്തതിന് നാരദമുനിയുടെ നാക്ക് മുറിക്കുമെന്നു അങ്ങ് ഒരിക്കൽ അദ്ദേഹത്തെ ഭീഷണിപ്പെടുത്തി . അപ്പോൾ , " നിന്റെ പത്തു തലയും മനുഷ്യൻ മുറിച്ചു കളയുമെന്ന്"- നാരദൻ അങ്ങയെ ശപിച്ചിട്ടുണ്ട് .

12. ഋതുവർമ്മ ശാപം
🔥●●●ॐ▬▬▬࿗▬▬▬ॐ●●●🔥
മാരുതവനത്തിൽ വച്ച് വാനപ്രസ്ഥനായി വസിച്ച ഋതുവർമ്മന്റെ പത്നിയായ മദനമഞ്ജരിയെ അങ്ങ് ഒരിക്കൽ ബലാൽസംഗം ചെയ്‌തല്ലോ . അപ്പോൾ, "നീ മനുഷ്യനാൽ കൊല്ലപ്പെടും" - എന്ന് ഋതുവർമ്മൻ അങ്ങയെ ശപിച്ചു .

13. മൗൽഗല്യ ശാപം
🔥●●●ॐ▬▬▬࿗▬▬▬ॐ●●●🔥
കദംബവനവാസിയായ മൗൽഗല്യ മഹർഷി ഒരിക്കൽ യോഗദണ്ഡിൽ പിടലി താങ്ങിയിരിക്കുമ്പോൾ അങ്ങ് അവിടെയെത്തി അദ്ദേഹത്തിൻറെ യോഗദണ്ഡ് ചന്ദ്രഹാസം കൊണ്ട് വെട്ടി മുറിച്ചു . മുനി മലർന്നടിച്ചു വീണു . അപ്പോൾ ആ മുനി , " എടാ നീചാ , നിന്റെ ചന്ദ്രഹാസം ഇനി ഒരിടത്തും ഫലിക്കുകയില്ല " -എന്ന് അങ്ങയെ ശപിച്ചിട്ടുണ്ട് .

14. ബ്രാഹ്മണീജന ശാപം
🔥●●●ॐ▬▬▬࿗▬▬▬ॐ●●●🔥
സമുദ്രസ്നാനത്തിന് എത്തിയ ഏതാനും ബ്രാഹ്മണയുവതികൾ അവരുടെ അമ്മമാരുടെ മുന്നിൽ വച്ച് അങ്ങയാൽ മാനഭംഗത്തിനിരയായി . അപ്പോൾ ആ മാതാക്കൾ , " നിന്റെ കുടുംബിനിയേയും നിന്റെ കണ്മുന്നിൽ വച്ച് ഇതുപോലെ ചപല കപികൾ അപമാനിക്കും " -എന്നും അങ്ങയെ ശപിച്ചു .

15. അഗ്നി ശാപം
🔥●●●ॐ▬▬▬࿗▬▬▬ॐ●●●🔥
അഗ്നിയുടെ മുന്നിൽ വച്ച് അദ്ദേഹത്തിൻറെ പത്നിയായ സ്വാഹാദേവിയെ അങ്ങ് ബലാത്സംഗം ചെയ്തല്ലോ . അപ്പോൾ , " നീ നോക്കിയിരിക്കെ നിന്റെ പത്നിയെ കുരങ്ങന്മാർ ബലാത്സംഗം ചെയ്യും "-എന്ന് അഗ്നിദേവൻ അങ്ങയെ ശപിച്ചു .

16. അനരണ്യ ശാപം
🔥●●●ॐ▬▬▬࿗▬▬▬ॐ●●●🔥
സൂര്യവംശജനായ അനരണ്യൻ എന്ന രാജർഷിയെ അങ്ങ് ഒരിക്കൽ യുദ്ധത്തിന് വിളിച്ചു . വൃദ്ധനായ അദ്ദേഹത്തിന് യുദ്ധത്തിൽ താല്പര്യമില്ലാതിരുന്നിട്ടും അങ്ങയോടു അദ്ദേഹം പൊരുതി . തോല്വിപറ്റിയ അദ്ദേഹം അങ്ങയോടു സന്ധി ചെയ്യാനൊരുങ്ങുകയും , കരഞ്ഞുകൊണ്ട് "സഹായിക്കണം" എന്ന് പറയുകയും ചെയ്തില്ലേ . പക്ഷെ അങ്ങ് അദ്ദേഹത്തെ നെഞ്ചിലിടിച്ച് കൊന്നപ്പോൾ , അദ്ദേഹം - "എന്റെ വംശത്തിൽ ജനിച്ച ഒരു രാജകുമാരന്റെ അസ്ത്രങ്ങളാൽ നിന്റെ പത്തുശിരസ്സുകളുമറ്റു നീ മരിക്കും "-എന്ന് കരഞ്ഞുകൊണ്ട് മരണവാക്കായി അങ്ങയെ ശപിച്ചു .

17. ബൃഹസ്പതീ ശാപം
🔥●●●ॐ▬▬▬࿗▬▬▬ॐ●●●🔥
അങ്ങ് സ്വർഗ്ഗവിജയം കഴിഞ്ഞു വരുമ്പോൾ ബൃഹസ്പതിയുടെ മകളായ സുലേഖാദേവിയെ അങ്ങ് അദ്ദേഹത്തിൻറെ മുന്നിലിട്ട് ബലാൽക്കാരം ചെയ്തുവല്ലോ . അപ്പോൾ , " കാമബാണമേറ്റ് മദിക്കുന്ന നീ രാമബാണമേറ്റ് മരിക്കും "-എന്ന് ബൃഹസ്പതി അങ്ങയെ ശപിച്ചിട്ടുണ്ട് .

18. ബ്രഹ്മദേവ ശാപം
🔥●●●ॐ▬▬▬࿗▬▬▬ॐ●●●🔥
ബ്രഹ്‌മാവിന്റെ മാനസപുത്രിയായ പുഞ്ജികാദേവിയെ ഒരിക്കൽ അങ്ങ് അപമാനിക്കാൻ തുടങ്ങിയപ്പോൾ , "സമ്മതമില്ലാത്തവളെ തൊട്ടാൽ നിന്റെ തല പത്തും പൊട്ടിത്തെറിച്ചുപോകും "- എന്ന് ബ്രഹ്മദേവൻ അങ്ങയെ ശപിച്ചു .