അഷ്ടമൂര്‍തിരക്ഷാസ്തോത്രം (ഈശ്വരനന്ദഗിരിവിരചിതം)
ഹേ ശര്‍വ ഭൂരൂപ പര്‍വതസുതേശ
ഹേ ധര്‍മ വൃഷവാഹ കാഞ്ചീപുരീശ ।
ദവവാസ സൌഗന്ധ്യ ഭുജഗേന്ദ്രഭൂഷ
പൃഥ്വീശ മാം പാഹി പ്രഥമാഷ്ടമൂര്‍തേ ॥ 1॥
ഹേ ദോഷമല ജാഡ്യഹര ശൈലജാപ
ഹേ ജംബുകേശേശ ഭവ നീരരൂപ ।
ഗങ്ഗാര്‍ദ്ര കരുണാര്‍ദ്ര നിത്യാഭിഷിക്ത
ജലലിങ്ഗ മാം പാഹി ദ്വിതീയാഷ്ടമൂര്‍തേ ॥ 2॥
ഹേ രുദ്ര കാലാഗ്നിരൂപാഘനാശിന്‍
ഹേ ഭസ്മദിഗ്ധാങ്ഗ മദനാന്തകാരിന്‍ ।
അരുണാദ്രിമൂര്‍തേര്‍ബുര്‍ദശൈല വാസിന്‍
അനലേശ മാം പാഹി തൃതീയാഷ്ടമൂര്‍തേ ॥ 3॥
ഹേ മാതരിശ്വന്‍ മഹാവ്യോമചാരിന്‍
ഹേ കാലഹസ്തീശ ശക്തിപ്രദായിന്‍ ।
ഉഗ്ര പ്രമഥനാഥ യോഗീന്ദ്രിസേവ്യ
പവനേശ മാം പാഹി തുരിയാഷ്ടമൂര്‍തേ ॥ 4॥
ഹേ നിഷ്കലാകാശ-സങ്കാശ ദേഹ
ഹേ ചിത്സഭാനാഥ വിശ്വംഭരേശ ।
ശംഭോ വിഭോ ഭീമദഹര പ്രവിഷ്ട
വ്യോമേശ മാം പാഹി കൃപയാഷ്ടമൂര്‍തേ ॥ 5॥
ഹേ ഭര്‍ഗ തരണേഖിലലോകസൂത്ര
ഹേ ദ്വാദശാത്മന്‍ ശ്രുതിമന്ത്ര ഗാത്ര ।
ഈശാന ജ്യോതിര്‍മയാദിത്യനേത്ര
രവിരൂപ മാം പാഹി മഹസാഷ്ടമൂര്‍തേ ॥ 6॥
ഹേ സോമ സോമാര്‍ദ്ധ ഷോഡഷകലാത്മന്‍
ഹേ താരകാന്തസ്ഥ ശശിഖണ്ഡമൌലിന്‍ ।
സ്വാമിന്‍മഹാദേവ മാനസവിഹാരിന്‍
ശശിരൂപ മാം പാഹി സുധയാഷ്ടമൂര്‍തേ ॥ 7॥
ഹേ വിശ്വയജ്ഞേശ യജമാനവേഷ
ഹേ സര്‍വഭൂതാത്മഭൂതപ്രകാശ ।
പ്രഥിതഃ പശൂനാം പതിരേക ഈഡ്യ
ആത്മേശ മാം പാഹി പരമാഷ്ടമൂര്‍തേ ॥ 8॥
പരമാത്മനഃ ഖഃ പ്രഥമഃ പ്രസൂതഃ
വ്യോമാച്ച വായുര്‍ജനിതസ്തതോഗ്നിഃ
അനലാജ്ജലോഭൂത് അദ്ഭ്യസ്തു ധരണിഃ
സൂര്യേന്ദുകലിതാന്‍ സതതം നമാമി ।
ദിവ്യാഷ്ടമൂര്‍തീന്‍ സതതം നമാമി
സംവിന്‍മയാന്‍ താന്‍ സതതം നമാമി ॥ 9॥
ഇതി ശ്രീഈശ്വരനന്ദഗിരിവിരചിതം അഷ്ടമൂര്‍തിരക്ഷാസ്തോത്രം സമ്പൂര്‍ണം ।
No comments:
Post a Comment