ദേവി തത്ത്വം - 26

ദേവി തത്ത്വം - 26

PART - 01

ജീവൻ മുക്തന്റെ ആ ധന്യതയെ ആണ് ശക്തിലാസ്യം എന്ന് പറയുന്നത്.

ഈ ശരീരത്തിലുണ്ടാകുന്ന ശക്തിലാസ്യം ജ്ഞാനികൾക്ക് അനുഭവവേദ്യമായിട്ടുള്ള വിഷയമാണ്.

ഇത്രയൊക്കെ ജ്ഞാനം നമുക്ക് വരണമെങ്കിൽ, ബ്രഹ്മ വിദ്യ ഉള്ളിൽ തെളിയണമെങ്കിൽ ബ്രഹ്മ സ്വരൂപിണിയായ അംബികയുടെ കൃപ നമുക്കുണ്ടാകണം.

ഈ വിഷയം ഒരു verbal compartment ന്റെ ഉള്ളിൽ ഇടാൻ പറ്റില്ല.

ഇത് നാം അനുഭവിക്കേണ്ട ഒന്നാണ്.

നമ്മുടെ വ്യക്തിത്വം ഭഗവാന്റെ കൃപയ്ക്ക് പാത്രമാകുമ്പോൾ വ്യക്തിത്വം വ്യക്തിത്വമല്ലാതായി തീരുമ്പോൾ ശരീരത്തിലിരിക്കുമ്പോൾ ആ മഹാശക്തി നമ്മളെ ഒരു യന്ത്രം കണക്കെ വച്ച് ആനന്ദിപ്പിക്കുന്നതും നമുക്കനുഭവിക്കാം.

അങ്ങനെ ഒരു ആനന്ദ സ്ഥിതി നമുക്ക് ലക്ഷ്യ സ്ഥാനമായുണ്ട് എന്നറിയുക. അതായത് ശരീരത്തിലിരിക്കുമ്പോൾ നമുക്ക് ആനന്ദം മാത്രമായിരിക്കാൻ കഴിയും.

ശരീരത്തിന് വ്യാധി വരുന്നത് കൊണ്ടോ വിഷമം വരുന്നത് കൊണ്ടോ ഒന്നു കൊണ്ടും ബാധിക്കപ്പെടാത്ത ഒരാനന്ദം.

ആ ആനന്ദമാണ് ശക്തിലാസ്യം. ശുദ്ധമായ ശക്തിയുടെ ആവിർഭാവം. അതിനെ ചിത് ശക്തിയെന്നും പറയുന്നു.

ആ ആനന്ദം അനുഭവിക്കാൻ സാധിച്ചാൽ നമ്മുടെ ജീവിതം ധന്യമായി.

ആ ആനന്ദത്തിന് സാധനയൊന്നും പ്രധാനമല്ല. സാധന ചിത്ത ശുദ്ധിക്കു വേണ്ടിയാണ്.

മുഖ്യമായ കാര്യം ആശ്രയമാണ്.

നമ്മുടെ ജീവിതത്തെ മുഴുവൻ നിയന്ത്രിക്കുന്ന തത്ത്വം നാം എന്തിനെ ആശ്രയിക്കുന്നു എന്നതാണ്.
ഭാഗവതത്തിൽ പന്ത്രണ്ടാമത്തെ സ്കന്ദത്തിന് ആശ്രയ സ്കന്ദം എന്നാണ് പറയുന്നത്. പതിനൊന്നാമത്തെ സ്കന്ദം മുക്തി സ്കന്ദമാണ്. ഇവിടെ മുക്തി കഴിഞ്ഞാണ് ആശ്രയം.

മുക്തി എന്നത് സ്വരൂപേണ അവസ്ഥിതിഃ

എന്ന് ഭാഗവതത്തിൽ വ്യാഖ്യാനിക്കുന്നു. തന്റെ യഥാർത്ഥ സ്വരൂപം അറിയുന്നതാണ് മുക്തി.

അറിഞ്ഞ് കഴിഞ്ഞാൽ പിന്നെ നിത്യ മുക്തമാണ് നമ്മൾ. ഒന്നും നേടിയെടുക്കാനില്ല.

കിട്ടിയിട്ടുള്ളതാണ് പ്രാപിക്കേണ്ടതല്ല. അതറിഞ്ഞ് കഴിഞ്ഞിട്ട് വീണ്ടും ശരീര തലത്തിൽ നിൽക്കുമ്പോൾ നമ്മൾ ഏതൊരു നിത്യ വസ്തുവിനെ ഉള്ളിൽ കണ്ടുവോ അതിൽ നിന്നും പുറപ്പെടുന്ന ശക്തി അഥവാ സഗുണ ബ്രഹ്മത്തെ ആശ്രയിച്ച് കൊണ്ട് ലോകത്തിൽ ജീവിക്കുമ്പോഴാണ് ആനന്ദം ഉണ്ടാകുന്നത്.