അയിനിയൂട്ട്

അയിനിയൂട്ട്

കേരളത്തിലെ നമ്പൂതിരി, വിശ്വകർമ്മ സമുദായങ്ങളിൽ വിവാഹത്തോടനുബന്ധിച്ച് നടക്കുന്ന ഒരു ചടങ്ങാണ് അയിനിയൂട്ട്, ആയിനൂൺ എന്നും പറയും, വിവാഹ തലേ ദിവസം ആണ് ഈ ചടങ്ങ് നടത്തുന്നത്. രണ്ട് കൂട്ടരുടെയും ചടങ്ങിൽ ചില വ്യത്യാസങ്ങൾ കാണാം, എന്നാൽ ചടങ്ങിൻ്റെ പേര് ഒന്ന് തന്നെയാണ്, വിവാഹ തലേ ദിവസം വധു ഗണപതിക്ക് ഒരുക്കുന്നു, ഇതിനെ മാതൃപൂജനം എന്ന് പറയും, അതിനു ശേഷമാണ് അയിനിയൂട്ട് (അയിനിവിളമ്പൽ, കന്യകാഊട്ട്) നടത്തുന്നത്,

വിവാഹ തലേ ദിവസം പെൺകുട്ടി സന്ധ്യാ ദീപം തെളിയിച്ചതിനു ശേഷം ഗണപതി ഒരുക്കൽ നടത്തുന്നു, ഗണപതിയെ യഥാവിധി പെൺകുട്ടി പൂജ ചെയ്ത് ഉണക്കലരി ചോറ് നിവേദിക്കും, ഇതുപോലെ ഒരു ചടങ്ങ് വരൻ്റെ വീട്ടിലും വിവാഹ ദിവസം കാലത്ത് ചെയ്യാറുണ്ട്, വിവാഹത്തിന് വധുവിൻ്റെ വീട്ടിലേക്ക് പുറപ്പെടുന്നതിനു തൊട്ടുമുമ്പായി മുറ്റത്ത് അരിക്കോലമെഴുതി ആവണപ്പലക വെച്ച് നിലവിളക്ക് തെളിച്ച് അതിനു മുന്നിൽ നാക്കിലയിൽ ഉണക്കലരി ചോറ് മധുരം ചേർത്തത് ഗണപതിക്ക് അഥവാ പരദേവത സങ്കല്പത്തിൽ വരൻ്റെ സഹോദരിമാർ വിളമ്പും, അടുത്ത് തന്നെ വരനും വരൻ്റെ സഹോദരിമാരും ഇരുന്ന് ഉണക്കലരി ഭക്ഷണം കഴിക്കുന്നു,

വിവാഹത്തിന് ഏഴുദിവസം മുമ്പ് വധു നവധാന്യങ്ങൾ മുളപ്പിക്കാൻ വിത്ത് പാകും, വിവാഹ ചടങ്ങിലെ പൂജയിൽ ഇത് അങ്കുരാർപ്പണം ചെയ്യും,

വിവാഹം കഴിഞ്ഞ് അന്നേ ദിവസം തന്നെ വധു വരൻ്റെ വീട്ടിലേക്ക് ഏഴൂവരി പാത്രങ്ങളോടെയാണ് വരുന്നത്, വിവാഹ ദിവസം വധുവിനൊപ്പം കല്യാണ പന്തലിൽ ഏഴൂവരിപാത്രങ്ങൾ വെക്കുന്നചടങ്ങ് തമിഴ് ബ്രാഹ്മണർക്കും വിശ്വകർമ്മജർക്കും മാത്രം ഉള്ളു, മറ്റാർക്കും ഈ ചടങ്ങ് ഇല്ല, വധുവിനെ വരൻ്റെ ഗൃഹത്തിലേക്ക് കൈപ്പിടിച്ച്കയറ്റി ഇരുത്തിയ ശേഷം വരൻ്റെ കുടുംബത്തിലെ സ്ത്രി ജനങ്ങൾ ലക്ഷ്മി ഗണപതി പാടും, ഈ ചടങ്ങുകൾ എല്ലാം ഇന്നും ആചരിക്കുന്ന വിശ്വകർമ്മ, ബ്രാഹ്മണ കുടുംബങ്ങൾ ഉണ്ട്.