ശിവലിംഗമെന്നതിന്റെ പൊരുൾ

ശിവലിംഗമെന്നതിന്റെ പൊരുൾ

യോഗിനീ ഹൃദയത്തിൽ ലിംഗമെന്ന പദത്തിന്റെ വ്യാഖ്യാനം ഇങ്ങനെയാണ്.

 "ചിത്സ്ഫുരിതാ ധാരത്വം"

ലിംഗമെന്നത് മനസ്സ്, അഹങ്കാരം, ബുദ്ധി, ഇവയെയും കുറിക്കുന്നു.

മനുഷ്യരൂപത്തിലുള്ള ശിവ ബിംബം 2 വിധം.

ഒന്ന് - ഏകമുഖം.

രണ്ട് - പഞ്ചമുഖം.

ലിംഗങ്ങൾ അഞ്ച് രൂപത്തിൽ കാണപ്പെടുന്നു.

1. സ്വയംഭൂലിംഗം

2. ബിന്ദുലിംഗം

3. പ്രതിഷ്ഠാലിംഗം

4. പരലിംഗം

5. ഗുരുലിംഗം

സ്വയംഭൂലിംഗം:- 

പേർ സൂചിപ്പിക്കുന്നതിൻ പ്രകാരം ഭൂമിയിൽ സ്വയമേൽ ഉണ്ടായവയാണ് ഇത്.

ബിന്ദുലിംഗം:-

പ്രണവമന്ത്രം ഒരു പ്രത്യേക മാത്രാക്രമത്തിൽ ജപിക്കുമ്പോൾ ബിന്ദു ലിംഗം മനസ്സിൽ പ്രത്യക്ഷപ്പെടുകയും, മറ്റൊരു മാത്രയിൽ പഞ്ചാക്ഷരിമന്ത്രം ഇതിൽ കേന്ദ്രീകരിച്ച് ജപിക്കുകയും ചെയ്യുമ്പോൾ ശിവ സാന്നിധ്യം അനുഭവപ്പെടുന്നു.

പ്രതിഷ്ഠാലിംഗം:- 

ക്ഷേത്രങ്ങളിൽ ഉള്ള ശിവലിംഗങ്ങൾക്ക് 3 ഭാഗങ്ങളുണ്ട്. ഏറ്റവും താഴെ കാണപ്പെടുന്ന ചതുരശ്ര ഭാഗമാണ് ബ്രഹ്മഭാഗം.

മധ്യഭാഗമാണ് അഷ്ടാശ്രഭാഗം: വിഷ്ണു ഭാഗം.

ഈ രണ്ട് ഭാഗങ്ങളും പീഠത്താൽ മറയ്ക്കപ്പെടുന്നു. പീഠമുകളിൽ കാണപ്പെടുന്ന ഭാഗമാണ് വർത്തുളഭാഗം. ഇതാണ് രുദ്രഭാഗം. ഈ പൂജാ ഭാഗമെന്ന രുദ്രഭാഗത്ത് കാണപ്പെടുന്ന രേഖകളെ ബ്രഹ്മസൂത്രങ്ങളെന്നു പേർ പറയും.

പരലിംഗം:-

പരലിംഗം 3 തരം

1. രസലിംഗം:- ബ്രഹ്മപദപ്രാപ്തിക്ക് ഉപയോഗിക്കുന്നു.

2. സുവർണ്ണലിംഗം :- ഐശ്വര്യ വർദ്ധനവിന് ആരാധിക്കുന്നു.

 3. ബാണലിംഗം:- രാജാക്കന്മാർ, യോദ്ധാക്കൾ ഇവർ വിജയത്തിനായി ആരാധിക്കുന്നു.

ഗുരുലിംഗം:-

ആഗ്രഹങ്ങൾക്കതീതനും, മനസ്സിനെ നിയന്ത്രിച്ചവനും, ദിവ്യദർശനം ലഭിച്ചവനും, മറ്റുള്ളവരുടെ ദു:ഖത്തെയകറ്റുന്നവനും ആയ ഗുരുനാഥന്റെ പ്രതീകമാണിത്.

കൂടാതെ 5 പഞ്ചഭൂതലിംഗങ്ങൾ, 12 ജ്യോതിർലിംഗങ്ങൾ ഇവയും കാണപ്പെടുന്നു. ലിംഗം അണ്ഡാകൃതി പ്രതീകമാണ്. പ്രകൃതി, പുരുഷ സംയോഗ പ്രതീകമാണിത്. മനസ്സ് ഒരു വസ്തുവിൽ പൂർണ്ണമായും ഏകാഗ്രതയാകുമ്പോൾ മനസ്സിൽ ലിംഗ പ്രതീതിയുണ്ടാകുന്നു. ആനന്ദത്തിന്റെ മറ്റൊരു ഭാവമാണിത്. പ്രപഞ്ചത്തിന്റെ അകവും, പുറവും വ്യാപിച്ചു നിലകൊള്ളുന്ന ശിവലിംഗം പ്രാപഞ്ചിക ഊർജ്ജത്തിന്റെ കേദാരമാണ്.