കൃഷ്ണന്‍ ചെറുവിരലില്‍ ഉയര്‍ത്തി നിര്‍ത്തിയ ആ പര്‍വതം ഇവിടെയുണ്ട്!!!
ശ്രീകൃഷ്ണനുമായി ബന്ധപ്പെട്ട് നിരവധി കഥകളാണ് പ്രചാരത്തിലുള്ളത്. കൃഷ്ണന്റെ വികൃതികളും കൃഷ്ണലീലയും ധീരകഥകളുമൊക്കെ ധാരാളമുണ്ട്. ഇതില്‍ ഏറ്റവും പ്രശസ്തമായ കഥയാണ് ശ്രീകൃഷ്ണന്‍ തന്റെ ചെറുവിരലില്‍ ഗോവര്‍ദ്ധന പര്‍വതം എടുത്തുയര്‍ത്തിയ കഥ. കനത്ത പേമാരിയില്‍ നിന്ന് ഗോക്കളെയും മനുഷ്യരെയും രക്ഷിക്കാനാണ് കൃഷ്ണന്‍ അങ്ങനെ ചെയ്തത്. ചെറുപ്പത്തില്‍ ഈ കഥ നിങ്ങള്‍ അതിശയത്തോടെയായിരിക്കും കേട്ടിട്ടുള്ളത്. മഴയത്ത് നനയാതിരിക്കാന്‍ കുട പിടിക്കുന്ന ലാഘവത്തോടെയാണ് കൃഷ്ണന്‍ ആ പര്‍വതത്തെ എടുത്തുയര്‍ത്തിയത്. സിനിമകളിലും സീരിയലുകളിലും ഈ രംഗം ആവര്‍ത്തിച്ചു കണ്ടു. ചുമര്‍ ചിത്രങ്ങളിലും ഗോവര്‍ദ്ധനോദ്ധാരണം തെളിഞ്ഞു നിന്നു. പാഠപുസ്തകങ്ങളിലും ഇടംപിടിച്ചു. എന്നാല്‍ കൃഷ്ന്‍ എടുത്തുയര്‍ത്തിയ ആ പര്‍വതം യഥാര്‍ത്ഥത്തില്‍ എവിടെയാണെന്നറിയാമോ?
അതിനു മുമ്പ് ഈ കഥ കേള്‍ക്കണം
കൃഷ്ണന്റെ ജന്മസ്ഥലമായ വൃന്ദാവനത്തിലെ ജനങ്ങള്‍ ഇന്ദ്രനെ പൂജിച്ചിരുന്നു. ഇന്ദ്രനെ തൃപ്തിപ്പെടുത്താന്‍ എല്ലാ വര്‍ഷവും ഇവര്‍ പൂജ ചെയ്തു വന്നിരുന്നു. എന്നാല്‍ നമ്മള്‍ ഇന്ദ്രനെ അല്ല പൂജിക്കേണ്ടതെന്നും ഗോക്കളെയാണ് പൂജിക്കേണ്ടതെന്ന് കൃഷ്ണന്‍ നിര്‍ദേശിക്കുന്നു. ഇതനുസരിച്ച് ഇന്ദ്രനെ പൂജിക്കുന്നതില്‍ നിന്ന് നാട്ടുകാര്‍ പിന്‍മാറുകയു ചെയ്തു. ഇതില്‍ കോപാകുലനായ ഇന്ദ്രന് ഗ്രാമീണരെ ശിക്ഷിക്കാന്‍ തീരുമാനിക്കുന്നു. ഇന്ദ്രന് ഇതിനായി പേമാരി സൃഷ്ടിച്ചു. നിര്‍ത്താതെ പെയ്യുന്ന മഴയില്‍ ജനങ്ങളും ഗോക്കളും വിഷമിച്ചപ്പോഴാണ് കൃഷ്ണന്‍ ഒരു പര്‍വതം എടുത്തുയര്‍ത്തിയത്. പരന്ന രൂപത്തിലുള്ള പര്‍വതമായിരുന്നു അത്. നാട്ടുകാരെയും ഗോക്കളെയും മുഴുനവനായി അതിനടിയില്‍ ഉള്‍ക്കൊള്ളാനായി. ഇന്ദ്രന്റെ കോപം ഏഴു ദിവസം നീണ്ടു നിന്നു. ഈ ഏഴു ദിവസവും കൃഷ്ണന്‍ പര്‍വതം ഉയര്‍ത്തി നില്‍ക്കുകയായിരുന്നു. ഒടുവില്‍ കൃഷ്ണന്റെ ദൈവീക ശക്തിക്കു മുന്നില്‍ ഇന്ദ്രന് കീഴടങ്ങേണ്ടി വന്നു. കൃഷ്ണനെ അംഗീകരിക്കേണ്ടിയും വന്നു. ഗിരിധാരി എന്ന പേരില്‍ കൃഷ്ണന്‍ അറിയപ്പെട്ടു തുടങ്ങിയതും ഈ സംഭവത്തിന് ശേഷമാണ്.
എവിടെയാണ് ഗോവര്‍ദ്ധനഗിരി
കൃഷ്ണന്‍ അന്ന് എടുത്തുയര്‍ത്തി ഗോവര്‍ദ്ധന പര്‍വതം നേരിട്ട് കാണാന്‍ ആഗ്രഹമുണ്ടോ. ഉത്തര്‍ പ്രദേശിലെ മഥുര ജില്ലയില്‍ വൃന്ദാവനത്തിലെത്തിയാല്‍ ഈ പര്‍വതം കാണാനാകും. സാധാരണ പര്‍വതങ്ങളില്‍ നിന്ന് വ്യത്യസ്തമാണ് ഈ പര്‍വതത്തിന്റെ രൂപഘടന. ഉയരത്തില്‍ തലയുയര്‍ത്തി നില്‍ക്കുന്നതിന് പകരം പരന്നു വിശാലമായി നില്‍ക്കുന്ന പര്‍വതാണിത്. ഉയരം കുറവാണ്. 11 കിലോമീറ്റര്‍ ചുറ്റളവുണ്ട് ഗോവര്‍ദ്ധനഗിരിക്ക്. പരന്നിരിക്കുന്ന പര്‍വതമായതിനാലാണ് കൃഷ്ണന്‍ തന്റെ ഗ്രാമീണരെ പേമാരിയില്‍ നിന്ന് രക്ഷിക്കാന്‍ ഇത് കുടയായി ചൂടിയത്. വൃന്ദാവനത്തില്‍ നിന്ന് 22 കിലോമീറ്റര്‍ സഞ്ചരിച്ചാല്‍ ഗോവര്‍ദ്ധനഗിരിയിലെത്താം. പര്‍വതത്തിന് ചുറ്റും വലംവയ്ക്കുന്നത് കൃഷ്ണഭക്തര്‍ പുണ്യമായി കരുതാറുണ്ട്. ഒരു വലം വയ്ക്കണമെങ്കില്‍ 11 കിലോമീറ്റര്‍ നടക്കണം. കുട്ടികളും മുതിര്‍ന്നവരും അടക്കം നിരവധിപ്പേര്‍ ഗോവര്‍ദ്ധന ഗിര ചുറ്റാറുണ്ട്. യമുന നദിയുടെ തീരത്താണ് ഗോവര്‍ദ്ധനഗിരി സ്ഥിതി ചെയ്യുന്നത്.
പര്‍വതത്തിലെ കാഴ്ച്ചകള്‍
ഗോവര്‍ദ്ധനഗിരിയിലെ കെട്ടിടങ്ങളും സ്മാരകങ്ങളും പതിനാറാം നൂറ്റാണ്ടിലേതാണ്. എന്നാല്‍ ഇതുമായി ബന്ധപ്പെട്ട് തെളിവുകളൊന്നും പുരാവസ്തു വകുപ്പിന്റെ പക്കലില്ല. ഗോവര്‍ദ്ധനഗിരിക്ക് സമീപമുള്ള ചില സ്ഥലങ്ങള്‍ വിനോദ സഞ്ചാര മേഖലകളാമ്. കുസും സരോവര്‍ സാന്റ്‌സ്‌റ്റോണ്‍, ഗിരിരാജ ക്ഷേത്രം, ശ്രീ ചൈതന്യ ക്ഷേത്രം, രാധാ കുണ്ഡ് ക്ഷേത്രം, മാനസി ഗംഗ ക്ഷേത്രം, ദന്‍ഗട്ടി ക്ഷേത്രം തുടങ്ങിയവ പ്രധാന സ്ഥലങ്ങളാണ്.
എങ്ങനെ എത്തിച്ചേരാം
ഉത്തര്‍ പ്രദേശില്‍ സ്ഥിതി ചെയ്യുന്ന ഒരു മനോഹരമായ പര്‍വതമാണ് ഗോവര്‍ദ്ധന ഗിരി. റോഡ് മാര്‍ഗവും ട്രെയിന്‍ മാര്‍ഗവും വിമാനമാര്‍ഗവും ഇവിടെ എത്തിച്ചേരാം. ആഗ്രയാണ് അടുത്ത വിമാനത്താവളം. എന്നാലും ഡല്‍ഹിയിലെ ഇന്ദിരാ ഗാന്ധി വിമാനത്താവളത്തില്‍ വന്നിറങ്ങുന്നതാകും നല്ലത്. എല്ലാ പ്രധാനപ്പെട്ട നഗരങ്ങളില്‍ നിന്നും ഇവിടേക്ക് വിമാന സര്‍വീസുകള്‍ ലഭ്യമാണ്. വിമാനത്താവളത്തില്‍ നിന്ന് ഗോവര്‍ദ്ധനിലേക്ക് ക്യാബുകളും ടാക്‌സികളും ലഭിക്കും. ട്രെയിന്‍ മാര്‍ഗം വരുന്നവര്‍ മഥുരയിലെ ഗോവര്‍ദ്ധന്റെ അടുത്ത റെയില്‍വേ സ്‌റ്റേഷനായ മഥുരയിലാണിറങ്ങേണ്ടത്. ഇവിടെ നിന്ന് 22 കിലോമീറ്ററുണ്ട്. ഉത്തരേന്ത്യയിലെ പ്രധാന നഗരങ്ങളായ ഡല്‍ഹി, ലക്‌നൗ, കാണ്‍പൂര്‍ തുടങ്ങിയ സ്ഥലങ്ങളില്‍ നിന്ന് മഥുരയിലേക്ക് ട്രെയിന്‍ സര്‍വീസുണ്ട്. സ്റ്റേഷനിലെത്തിയാല്‍ കാബുകളിലോ ഓട്ടോറിക്ഷയിലോ ഗോവര്‍ദ്ധനിലെത്താം. അരമണിക്കൂര്‍ നീണ്ട യാത്രയാണിത്. റോഡ് മാര്‍ഗവും ഗോവര്‍ഗദ്ധനിലെത്തിച്ചേരാം. പ്രധാനപ്പെട്ട നഗരങ്ങളില്‍ നിന്ന് മഥുരയിലേക്ക് ഉത്തര്‍ പ്രദേശ് സ്റ്റേറ്റ് റോഡ് ട്രാന്‍സ്‌പോര്‍ട്ട് കോര്‍പ്പറേഷന്റെ ബസ് സര്‍വീസുകളുണ്ട്. ഇവിടെ നിന്ന് ലോക്കല്‍ ബസിലോ ടാക്‌സിയിലോ ഗോവര്‍ദ്ധനിലേക്ക് യാത്ര ചെയ്യാം.
No comments:
Post a Comment