യോഗയുടെ ഗുണങ്ങള്‍
ഭാഗം - 5
യോഗയും ജീവിതശൈലീരോഗങ്ങളും
ജീവിത ശൈലീരോഗങ്ങളെക്കുറിച്ച് പറയുന്നതിനു മുൻപ് കുറച്ചു് പഴംകഥ പറയാം.
രണ്ടുമൂന്ന് തലമുറയ്ക്കു മുൻപ് ജനങ്ങളുടെ ജീവിതരീതി പരിശോധിച്ചാൽ മനസ്സിലാകും അവർ ഒരിക്കലും വ്യായാമം ചെയ്യാനായി ഒന്നും ചെയ്യാറില്ലായിരുന്നു എന്ന്. പകരം ജീവിതത്തിന്റെ നാനാതുറകളിലും അവർ ജീവിക്കുവാനായി ചെയ്യുന്നതെല്ലാം വ്യായാമ തുല്യമായിരുന്നു എന്നും.
നടക്കുകയോ സൈക്കിൾ ചവിട്ടുകയോ ആയിരുന്നു സഞ്ചാരമാർഗ്ഗം. ശരീരം കൊണ്ട് അത്യധ്വാനം ചെയ്തിട്ടായിരുന്നു ഓരോ ദിവസത്തെയും ചര്യകൾ നടത്തിയിരുന്നത്. ആഹാരം പാകം ചെയ്യുന്നതു മുതൽ വീട് വൃത്തിയാക്കുന്നതിൽ വരെ ശാരീരികാധ്വാനം തന്നെയായിരുന്നു മുഖ്യമായും.
ആധുനിക കാലത്തിൽ ഇവയെല്ലാം യന്ത്രങ്ങൾ കീഴടക്കിയിരിക്കുന്നു. പണ്ട് അരച്ചാൺ വയറ് നിറയ്ക്കാൻവേണ്ടി (ആഹാരത്തിനായി ) മനുഷ്യൻ കിലോമീറ്ററുകൾ നടക്കുമായിരുന്നു, ഇന്നിപ്പോൾ അരച്ചാൺ വയറു കുറയ്ക്കുവാനായി കിലോമീറ്ററുകൾ നടക്കുകയാണ് മനുഷ്യർ. ജീവിക്കുവാൻ അത്യന്താപേക്ഷിതമായ ശുദ്ധവായു, ശുദ്ധഭക്ഷണം, ശുദ്ധജലം എന്നിവ പണ്ട് സുലഭമായിരുന്നു. മനുഷ്യന്റെ അപകടകരമായ അത്യാഗ്രഹവും ധനമോഹവും കാരണം ഇവ മൂന്നും ഇന്ന് ദു:ർലഭമായിക്കൊണ്ടിരിക്കുകയാണ്.
തിരക്കുപിടിച്ച ജീവിതക്രമത്തിൽ വ്യായാമത്തിന് സ്ഥാനമില്ലാതായി, ഫലമോ അമിതവണ്ണവും അതിനെ തുടർന്നുള്ള അസ്വസ്ഥതകളും രോഗങ്ങളും. സമീകൃതമല്ലാത്തതും ക്രമം തെറ്റിയുമുള്ള ഭക്ഷണം മാരകരോഗങ്ങൾക്ക് കാരണമാകുന്നു. അന്തരീക്ഷ മലിനീകരണവും മായം ചേർന്ന ഭക്ഷണവും ഗുണനിലവാരമില്ലാത്ത ഭക്ഷ്യവസ്തുക്കളും മനുഷനെ നിത്യരോഗികളാക്കുന്നു. ആസ്തമ, പ്രമേഹം, അർബുദം, ദു:ർമേദസ്സ്, മന:സംഘർഷം, രക്തസമ്മർദ്ദം ഇവയെല്ലാം ജീവിത ശൈലീ രോഗങ്ങൾ മാത്രമാണ്. യോഗ ചെയ്യുന്നതിലൂടെ ഇവയൊക്കെ പൂർണമായും നിയന്ത്രിച്ച് ഇല്ലാതാക്കാൻ കഴിയും.
ആസ്തമ
മലിനമായ അന്തരീക്ഷം, തെറ്റായ ഭക്ഷ ക്രമം, ഉറക്കമില്ലായ്മ, സുഗന്ധദ്രവ്യങ്ങളുടെ അമിതമായ ഉപയോഗം, ലഹരി വസ്തുക്കളുടെ ഉപയോഗം തുടങ്ങിയവയാണ് ആസ്തമയുടെ കാരണങ്ങൾ. ശ്വാസനാളങ്ങളിൽ അമിതമായി അടിഞ്ഞുകൂടുന്ന കഫം വരണ്ട് കട്ടപിടിച്ച് ശ്വാസകോശങ്ങളുടെ വികാസ സങ്കോച ശേഷി കുറഞ്ഞ് ശ്വാസതടസ്സം അനുഭവപ്പെടുന്നു. ഇത് കഠിനമായ ശ്വാസം മുട്ടലിനും വലിവിനും ഇടയാക്കുന്ന ആസ്തമയായി മാറുന്നു. ഇതൊരു മാറാവ്യാധിയല്ല, മറിച്ച് ശരിയായ ജീവിതരീതി കൊണ്ടും ചിട്ടയായ യോഗാസനങ്ങളും കൊണ്ട് നിശ്ശേഷം സുഖപ്പെടുത്താവുന്നതാണ്.
പൊടിപടങ്ങളില്ലാത്ത സ്ഥലങ്ങൾ തിരഞ്ഞെടുത്ത് പെരുമാറുക, ശുദ്ധവായു ധാരാളം ലഭിക്കുന്ന സ്ഥലങ്ങളിൽ താമസിക്കുക എന്നിവയാണ് ജീവിത ചര്യയിൽ പാലിക്കേണ്ടത്.
മുട്ട, മാസം, പഴം, നെയ്യ്, തൈര്, കിഴങ്ങുവർഗ്ഗങ്ങൾ, ലഹരിപദാർത്ഥങ്ങൾ, പുകയില ഉൽപ്പന്നങ്ങൾ ഒഴിവാക്കുക എന്നതാണ് ആഹാരക്രമത്തിൽ പാലിക്കേണ്ടത്. യോഗാസങ്ങളായ ഏക പാദ ഉത്ഥാനാസനം, പവന മുക്താസനം, ശലഭാസനം, ഭുജംഗാസനം, വിപരീത കരണി, വജ്രാസനം, ഹലാസനം എന്നിവയും നാഡീശുദ്ധി പ്രാണായാമവും ഉത്തമമാണ്
പ്രമേഹം
അമിതവും അലസവുമായ ഭക്ഷണം, വ്യായാമമില്ലായ്മ, മധുര പദാർത്ഥങ്ങളുടെ അമിത ഉപയോഗം, മദ്യപാനം, ചിലയിനം മരുന്നുകളുടെ ഉപഭോഗം, എല്ലാറ്റിനും ഉപരി പാരമ്പര്യം എന്നിവയെല്ലാം പ്രമേഹത്തിന് കാരണമാണ്. അമിതമായ ദാഹം, മൂത്രത്തിലോ രക്തത്തിലോ അല്ലെങ്കിൽ രണ്ടിലുമോ പഞ്ചസാര ഉണ്ടായിരിക്കും എന്നിവയാണ് ലക്ഷണങ്ങൾ.
ആഹാര നിഷ്ഠ പാലിക്കുക. ഒപ്പം പാദ ഹസ്താസനം, സിദ്ധാസനം, ഹലാസനം, ചക്രാസനം, മയൂരാസനം, അർദ്ധമത്സേന്ദ്രിയാസനം, സർവ്വാഗാസനം, മത്സ്യാസനം എന്നിവയും സഹജവസ്തിക്രിയ ഭ്രാമരിപ്രാണായാമം എന്നിവയും അഭികാമ്യം.
അർബുദം
മാംസ്യാഹാരത്തിന്റെ അമിത ഉപഭോഗം, അമിതമായ മരുന്നുകളുടെ ഉപയോഗം എന്നിവയും പാരമ്പര്യവുമാണ് അർബുദത്തിന്റെ കാരണങ്ങൾ
പച്ചിലക്കറികളുടെ ഉപയോഗം കൂട്ടുക ഒപ്പം വൃക്ഷാസനം, പർവ്വതാസനം എന്നീ യോഗാസനങ്ങൾ ശീലിക്കുകയും ചെയ്യുക
ദു:ർമേദസ്സും രക്തസമ്മർദ്ദവും
പുതിയ കാലത്തിലെ ഒരു പ്രധാന പ്രശ്നമാണ് പൊണ്ണത്തടി അഥവാ ദു:ർമേദസ്സ്. അമിതമായ ആഹാരശീലം, മധുര പദാർത്ഥങ്ങളുടെ അമിത ഉപയോഗം, മദ്യം വ്യായാമമില്ലായ്മ എന്നിവയാണ് പൊണ്ണത്തടിക്ക് കാരണം. പൊണ്ണത്തടി അമിത രക്തസമ്മർദ്ദത്തിന് കാരണമാകുന്നു. പാരമ്പര്യവും രക്തസമ്മർദ്ദത്തിന് കാരണമാകാം.
പച്ചക്കറി, ഇലവർഗ്ഗങ്ങൾ, പഴങ്ങൾ എന്നിവ ധാരാളമായി ആഹാരത്തിൽ ഉൾപ്പെടുത്തുക. മാസാഹാരം കഴിവതും ഇല്ലാതാക്കുക, ഭക്ഷണം നന്നായി ചവച്ചരച്ച് കഴിക്കുക, പൊരിച്ചതും വറുത്തതുമായ ഭക്ഷണങ്ങൾ ഒഴിവാക്കുക. ഉറങ്ങുന്നതിന് കുറഞ്ഞത് രണ്ടു മണിക്കൂർ മുൻപെ ആഹാരം കഴിക്കുക ഒപ്പം ,പശ്ചിമോത്താനാസനം, സുപ്ത വജ്രാസനം, മണ്ഡൂകാസനം, മയൂരാസനം, ധനുരാസനം എന്നീ ആസനങ്ങളും ഉഢ്യാണ ബന്ധം, നൗളി, കപാല ഭാതി എന്നീ പ്രാണായാമ ക്രിയകളും ശീലിക്കുക.
മന: സംഘർഷം
തൊഴിൽപരമായ കാരണങ്ങൾ, സാമ്പത്തിക കാരണങ്ങൾ, ചുറ്റുപാടുകളുടെ സമ്മർദ്ദങ്ങൾ, കുടുംബ ബന്ധങ്ങളിലെ പ്രശ്നങ്ങൾ തുടങ്ങി നിരവധിയാണ് മന:സംഘർഷത്തിനു കാരണമാകുന്നത്. മന:സംഘർഷം സ്വഭാവ വൈകല്യത്തിന് കാരണമാകുന്നു.
പൂർണമായുള്ള അഷ്ടാംഗയോഗ പരിശീലനം മാത്രം മതി മാനസിക സംഘർഷം ഒഴിവാക്കി ശരിയായ ആരോഗ്യം വീണ്ടെടുക്കുവാൻ.
മേൽ വിവരിച്ചതുകൂടാതെ മറ്റു പലയിനം വ്യാധികളും യോഗാഭ്യാസത്തിലൂടെ ഇല്ലാതാക്കി ആരോഗ്യമുള്ള ശരീരവും അതിൽ ആര്യോഗ്യമുള്ള മനസ്സും സ്വന്തമാക്കാം.
No comments:
Post a Comment