ശ്രീ ഛിന്നമസ്താസ്തോത്രം

॥ ശ്രീ ഛിന്നമസ്താസ്തോത്രം ॥

ശ്രീഗണേശായ നമഃ ।

ആനന്ദയിത്രി പരമേശ്വരി വേദഗര്‍ഭേ
മാതഃ പുരന്ദരപുരാന്തരലബ്ധനേത്രേ ।
ലക്ഷ്മീമശേഷജഗതാം പരിഭാവയന്തഃ
സന്തോ ഭജന്തി ഭവതീം ധനദേശലബ്ധ്യൈ ॥ 1॥

ലജ്ജാനുഗാം വിമലവിദ്രുമകാന്തികാന്താം
കാന്താനുരാഗരസികാഃ പരമേശ്വരി ത്വാം ।
യേ ഭാവയന്തി മനസാ മനുജാസ്ത ഏതേ
സീമന്തിനീഭിരനിശം പരിഭാവ്യമാനാഃ ॥ 2॥

മായാമയീം നിഖിലപാതകകോടികൂടവിദ്രാവിണീം
ഭൃശമസംശയിനോ ഭജന്തി ।
ത്വാം പദ്മസുന്ദരതനും തരുണാരുണാസ്യാം
പാശാങ്കുശാഭയവരാദ്യകരാം വരാസ്ത്രൈഃ ॥ 3॥

തേ തര്‍കകര്‍കശധിയഃ ശ്രുതിശാസ്ത്രശില്‍പൈശ്ഛന്ദോഽ-
ഭിശോഭിതമുഖാഃ സകലാഗമജ്ഞാഃ ।
സര്‍വജ്ഞലബ്ധവിഭവാഃ കുമുദേന്ദുവര്‍ണാം
യേ വാഗ്ഭവേ ച ഭവതീം പരിഭാവയന്തി ॥ 4॥

വജ്രപണുന്നഹൃദയാ സമയദ്രുഹസ്തേ
വൈരോചനേ മദനമന്ദിരഗാസ്യമാതഃ ।
മായാദ്വയാനുഗതവിഗ്രഹഭൂഷിതാഽസി
ദിവ്യാസ്ത്രവഹ്നിവനിതാനുഗതാഽസി ധന്യേ ॥ 5॥

വൃത്തത്രയാഷ്ടദലവഹ്നിപുരഃസരസ്യ
മാര്‍തണ്ഡമണ്ഡലഗതാം പരിഭാവയന്തി ।
യേ വഹ്നികൂടസദൃശീം മണിപൂരകാന്തസ്തേ
കാലകണ്ടകവിഡംബനചഞ്ചവഃ സ്യുഃ ॥ 6॥

കാലാഗരുഭ്രമരചന്ദനകുണ്ഡഗോല-
ഖണ്ഡൈരനങ്ഗമദനോദ്ഭവമാദനീഭിഃ ।
സിന്ദൂരകുങ്കുമപടീരഹിമൈര്‍വിധായ
സന്‍മണ്ഡലം തദുപരീഹ യജേന്‍മൃഡാനീം ॥ 7॥

ചഞ്ചത്തഡിന്‍മിഹിരകോടികരാം വിചേലാ-
മുദ്യത്കബന്ധരുധിരാം ദ്വിഭുജാം ത്രിനേത്രാം ।
വാമേ വികീര്‍ണകചശീര്‍ഷകരേ പരേ താമീഡേ
പരം പരമകര്‍ത്രികയാ സമേതാം ॥ 8॥

കാമേശ്വരാങ്ഗനിലയാം കലയാ
സുധാംശോര്‍വിഭ്രാജമാനഹൃദയാമപരേ സ്മരന്തി ।
സുപ്താഹിരാജസദൃശീം പരമേശ്വരസ്ഥാം
ത്വാമാദ്രിരാജതനയേ ച സമാനമാനാഃ ॥ 9॥

ലിങ്ഗത്രയോപരിഗതാമപി വഹ്നിചക്ര-
പീഠാനുഗാം സരസിജാസനസന്നിവിഷ്ടാം ।
സുപ്താം പ്രബോധ്യ ഭവതീം മനുജാ
ഗുരൂക്തഹൂँകാരവായുവശിഭിര്‍മനസാ ഭജന്തി ॥ 10॥।

ശുഭ്രാസി ശാന്തികകഥാസു തഥൈവ പീതാ
സ്തംഭേ രിപോരഥ ച ശുഭ്രതരാസി മാതഃ ।
ഉച്ചാടനേഽപ്യസിതകര്‍മസുകര്‍മണി ത്വം
സംസേവ്യസേ സ്ഫടികകാന്തിരനന്തചാരേ ॥ 11॥

ത്വാമുത്പലൈര്‍മധുയുതൈര്‍മധുനോപനീതൈര്‍ഗവ്യൈഃ
പയോവിലുലിതൈഃ ശതമേവ കുണ്ഡേ ।
സാജ്യൈശ്ച തോഷയതി യഃ പുരുഷസ്ത്രിസന്ധ്യം
ഷണ്‍മാസതോ ഭവതി ശക്രസമോ ഹി ഭൂമൌ ॥ 12॥

ജാഗ്രത്സ്വപന്നപി ശിവേ തവ മന്ത്രരാജമേവം
വിചിന്തയതി യോ മനസാ വിധിജ്ഞഃ ।
സംസാരസാഗരസമൃദ്ധരണേ വഹിത്രം ചിത്രം
ന ഭൂതജനനേഽപി ജഗത്സു പുംസഃ ॥ 13॥

ഇയം വിദ്യാ വന്ദ്യാ ഹരിഹരവിരിഞ്ചിപ്രഭൃതിഭിഃ
പുരാരാതേരന്തഃ പുരമിദമഗംയം പശുജനൈഃ ।
സുധാമന്ദാനന്ദൈഃ പശുപതിസമാനവ്യസനിഭിഃ
സുധാസേവ്യൈഃ സദ്ഭിര്‍ഗുരുചരണസംസാരചതുരൈഃ ॥ 14॥

കുണ്ഡേ വാ മണ്ഡലേ വാ ശുചിരഥ മനുനാ ഭാവയത്യേവ മന്ത്രീ
സംസ്ഥാപ്യോച്ചൈര്‍ജുഹോതി പ്രസവസുഫലദൈഃ പദ്മപാലാശകാനാം ।
ഹൈമം ക്ഷീരൈസ്തിലൈര്‍വാം സമധുകകുസുമൈര്‍മാലതീബന്ധുജാതീശ്വേതൈരബ്ധം
സകാനാമപി വരസമിധാ സമ്പദേ സര്‍വസിദ്ധ്യൈ ॥ 15॥

അന്ധഃ സാജ്യം സമാംസം ദധിയുതമഥവാ യോഽന്വഹം യാമിനീനാം
മധ്യേ ദേവ്യൈ ദദാതി പ്രഭവതി ഗൃഹഗാ ശ്രീരമുഷ്യാവഖണ്ഡാ ।
ആജ്യം മാംസം സരക്തം തിലയുതമഥവാ തണ്ഡുലം പായസം വാ ഹുത്വാ
മാംസം ത്രിസന്ധ്യം സ ഭവതി മനുജോ ഭൂതിഭിര്‍ഭൂതനാഥഃ ॥ 16॥

ഇദം ദേവ്യാഃ സ്തോത്രം പഠതി മനുജോ യസ്ത്രിസമയം
ശുചിര്‍ഭൂത്വാ വിശ്വേ ഭവതി ധനദോ വാസവസമഃ ।
വശാ ഭൂപാഃ കാന്താ നിഖിലരിപുഹന്തുഃ സുരഗണാ
ഭവന്ത്യുച്ചൈര്‍വാചോ യദിഹ നനു മാസൈസ്ത്രിഭിരപി ॥ 17॥

ഇതി ശ്രീശങ്കരാചാര്യവിരചിതഃ പ്രചണ്ഡചണ്ഡികാസ്തവരാജഃ സമാപ്തഃ ॥